ကမ္ဘာ့ဘောလုံးလောက၏ တန်ဖိုးအမြင့်ဆုံး စာချုပ်လျော်ကြေးပမာဏများကို နာမည်ကျော်ဘောလုံးဝက်ဘ်ဆိုက်ဖြစ်သည့် Goal.com က ဖော်ပြခဲ့သည်။ ကစားသမားများကို မယုံကြည်နိုင်စရာ စာချုပ်လျော်ကြေးပမာဏများ ထည့်သွင်းချုပ်ဆိုလေ့ရှိသည့် ရီးယဲလ်နှင့် ဘာစီလိုနာ အသင်းမှ ကစားသမားများသာ တန်ဖိုးအမြင့်ဆုံး ၁၂ ဦးစာရင်းတွင် ပါဝင်လျက်ရှိသည်။
ယင်း ၁၂ ဦးတွင် ရီးယဲလ်မက်ဒရစ်မှ ကိုးဦး၊ ဘာစီလိုနာမှ သုံးဦး စာရင်းပေါက်ခဲ့ကြောင်း သိရသည်။ ပရီးမီးယားလိဂ်၊ စီးရီးအေ၊ ဘွန်ဒစ်လီဂါနှင့် ပြင်သစ်လိဂ်များတွင် စာချုပ်လျော်ကြေးပမာဏကို ထည့်သွင်း ချုပ်ဆိုများရှိသော်လည်း လာလီဂါထိပ်သီး ရီးယဲလ်မက်ဒရစ်၊ ဘာစီလိုနာ အသင်းများကဲ့သို့ မဟုတ်ဘဲ ဖြစ်နိုင်ခြေရှိသည့် စျေးကွက်တန်ဖိုးအတိုင်း သာ ချုပ်ဆိုခြင်းဖြစ်သည်ဟု Goal.com က ဖော်ပြခဲ့သည်။
စာချုပ်လျော် ကြေးထည့်သွင်းထားသည့် အခြားထိပ်တန်းလိဂ်များမှ နာမည်ကျော်ကစားသမားအချို့၏ လျော်ကြေးပမာဏမှာ မန်စီးတီးကွင်းလယ်ကစားသမား ဒီဘရိုင်းနားက ယူရို သန်း ၂၅၀၊ ဂျူဗင်တပ်စ်တိုက်စစ်မှူး ဒီဘားလားက ယူရို သန်း ၇၀၊ မန်ယူကွင်းလယ်တိုက်စစ်ကစားသမား ဘရူနို ဖာနန်ဒက်စ်က ယူရို သန်း ၁၀၀ နှင့် ဒေါ့မွန်တိုက်စစ်မှူး ဟော်လန်းက ယူရို သန်း ၈၀ သာရှိနေသည်။
PSG ၏ နာမည်ကျော် MNM တိုက်စစ်အတွဲဖြစ်သည့် မက်ဆီ၊ နေမာနှင့် ဘာပေ၊ စပါးတိုက်စစ်မှူး ဟာရီကိန်း တို့၏စာချုပ်များတွင် လျော်ကြေးမထည့်သွင်းထားကြောင်း သိရသည်။
စာချုပ်လျော်ကြေးအမြင့်ဆုံး ကစားသမား ၁၂ ဦး
အမည် ကလပ် လျော်ကြေးပမာဏ(ယူရို)
ဘန်ဇီမာ ရီးယဲလ်မက်ဒရစ် တစ်ဘီလျံ
အလာဘာ ရီးယဲလ်မက်ဒရစ် သန်း ၈၅၀
ဂရီးဇ်မန်း ဘာစီလိုနာ(ယခု အငှားချ) သန်း ၈၀၀
ဗယ်လ်ဗာဒီ ရီးယဲလ်မက်ဒရစ် သန်း ၇၅၀
မိုဒရစ် ရီးယဲလ်မက်ဒရစ် သန်း ၇၅၀
ဘရာဟင်ဒီယက်ဇ် ရီးယဲလ်မက်ဒရစ်(ယခု အငှားချ) သန်း ၇၅၀
အဆန်စီယို ရီးယဲလ်မက်ဒရစ် သန်း ၇၀၀
ဗင်နီစီယပ်စ် ရီးယဲလ်မက်ဒရစ် သန်း ၇၀၀
အစ္စကို ရီးယဲလ်မက်ဒရစ် သန်း ၇၀၀
ဘေးလ် ရီးယဲလ်မက်ဒရစ် သန်း ၅၀၀
ပီကေး ဘာစီလိုနာ သန်း ၅၀၀
ဆာဂျီရောဘတ်တို ဘာစီလိုနာ သန်း ၅၀၀
