အာဆင်နယ်နည်းပြ အာတီတာက ဘုန်းမောက်နဲ့ပွဲမတိုင်ခင် ဆာကာရဲ့ဒဏ်ရာအခြေအနေကို ထုတ်ဖော်ပြောကြားလိုက်ပါတယ်။ ဆာကာဟာ ဂရိအသင်းကို အရေးနိမ့်ခဲ့တဲ့ပွဲမှာ ဒဏ်ရာရရှိခဲ့တာဖြစ်ပြီး အာဆင်နယ်အတွက် စိုးရိမ်စရာဖြစ်လာခဲ့ပါတယ်။
အာဆင်နယ်စတားဟာ အခုရာသီသစ်မှာ စွမ်းဆောင်ရည်ကောင်းတွေပြသနေပြီး အသင်းအတွက် ၂ ဂိုးသွင်း ၊ ၇ ဂိုးဖန်တီးပေးထားနိုင်ခဲ့ပါတယ်။ ဒါပေမယ့် အဆိုပါဒဏ်ရာအခြေအနေကြောင့် အာဆင်နယ်အသင်းပရိသတ်တွေက စိုးရိမ်နေခဲ့တာဖြစ်ပါတယ်။ အခုတော့ အာတီတာက ဆာကာရဲ့ဒဏ်ရာရအခြေအနေကို ထုတ်ဖော်ပြောကြားခဲ့ကာ အာဆင်နယ်ပရိသတ်တွေအတွက် သတင်းကောင်းဖြစ်လာခဲ့ပါတယ်။
သောကြာနေ့က သတင်းစာရှင်းပွဲမှာ “အဲ့တာက ကြီးမားတဲ့ဒဏ်ရာပြဿနာမဟုတ်ပါဘူး။ သူကအဆင်ပြေနေပါတယ်။ ပြီးခဲ့တဲ့ ၂ ရက်အတွင်း သူအကောင်းဆုံးလုပ်နိုင်ခဲ့ပါတယ်။ ယေဘုယျအားဖြင့် အင်္ဂလန်အသင်းအတွက် ဒုတိယမြောက်ပွဲကို ပါဝင်နိုင်ခြင်းတော့မရှိခဲ့ပါဘူး။
ဒါပေမယ့် ဒီနေ့နေ့လည်ခင်းမှာတော့ သူက လေ့ကျင့်ခန်းဆင်းနိုင်ခဲ့ပါတယ်။ ဘုန်းမောက်နဲ့ပွဲမတိုင်ခင် အခြေအနေကြည့်ပြီး သူ့ကိုအခွင့်အရေးပေးမှာပါ”လို့ အာတီတာက ဖြေကြားခဲ့ပါတယ်။ အာဆင်နယ်အသင်းမှာ ဒဏ်ရာပြဿနာတွေရှိနေပြီး ကိုင်ဟာဗက်ဇ်က ဒူးဒဏ်ရာပြဿနာရှိနေသလို မာတီနယ်လီလည်း ပေါင်ဒဏ်ရာပြဿနာရှိနေပါတယ်။
“သူ(ကိုင်) အနေနဲ့ ပြဿနာအနည်းငယ်ရှိနေပါတယ်။ အဲ့တာကိုလည်း အဆင်ပြေအောင် လုပ်နေပါတယ်။ ကိုင်က စွမ်းဆောင်ရည်ကောင်းတွေပြသနိုင်ခဲ့ပါတယ်။ နိုင်ငံအသင်းနဲ့လည်း အရမ်းကောင်းတဲ့ဆက်သွယ်မှုရှိပါတယ်။
ဒီနေ့မှာ သူလေ့ကျင့်ခန်းကောင်းကောင်းဆင်းနိုင်မယ်ဆိုရင် ကြံ့ခိုင်မှုပြည့်ဝမယ်ဆိုရင် သူပါဝင်လာနိုင်မှာပါ”လို့ စပိန်သားက ပြောကြားခဲ့ပါတယ်။အာဆင်နယ်အသင်းမှာ အခြားဒဏ်ရာရကစားသမားတွေအဖြစ် မာတင်အိုဒီဂတ် နဲ့ တီယာနေးတို့ရှိနေပြီး အိုဒီဂတ်ကတော့ မကြာခင်မှာ ပြန်လာနိုင်ဖို့ နီးစပ်နေပြီဖြစ်ပါတယ်။
အာဆင်နယ်ဟာ လာမယ့်စနေနေ့မှာ အဝေးကွင်းပွဲအဖြစ် ဘုန်းမောက်နဲ့ရင်ဆိုင်ရမှာဖြစ်ပါတယ်။
