ဘိုင်ယန်မြူးနစ်အသင်းမှ ထွက်ခွာရန် စီစဉ်နေသည့် ပိုလန်ဝါရင့်တိုက်စစ်မှူး လီဝန်ဒေါစကီးက အသင်းထွက်မှခွာရန် တွန်းအားပေးခြင်းနှင့်ပတ်သက်ပြီး သူကိုယ်သူ ကာကွယ်ခဲ့ကာ မိမိသည် တစ်ကိုယ်ကောင်းသမားမဟုတ် ကြောင်း ဂျာမန်သတင်းစာ Bild သို့ ပြောကြားခဲ့သည်။
အသက် (၃၃) နှစ်အရွယ်ရှိ လီဝန်ဒေါစကီးသည် ဘိုင်ယန်မြူးနစ်အသင်းနှင့် ၂၀၂၃ ခုနှစ်အထိ စာချုပ်သက်တမ်းရှိနေသော်လည်း ယခုနွေရာသီတွင် အသင်းနှင့်လမ်းခွဲခြင်းက နှစ်ဦးနှစ်ဖက်အတွက် အကောင်းဆုံးဖြစ်လိမ့်မည်ဟု ပြောကြားထားသူဖြစ်သည်။ လီဝန်ဒေါစကီး၏ ယင်းကဲ့သို့ ပြောဆိုမှုနှင့်ပတ်သက်ပြီး ဘိုင်ယန်မြူးနစ် အသင်းဥက္ကဋ္ဌဖြစ်သူ ဟာဘတ်ဟိုင်နာက ဝေဖန်မှုများပြုလုပ်ခဲ့ပြီး လီဝန်ဒေါစကီးအနေဖြင့် ယခုကဲ့သို့ လူသိရှင်ကြား ပြောဆိုခြင်းမလုပ်သင့်ကြောင်း ပြောကြားခဲ့သည်။ သို့သော် လီဝန်ဒေါစကီးက မိမိ၏ခံစားချက်ကို ရိုးသားစွာ ဝန်ခံခြင်းသာဖြစ်ပြီး မိမိသည် တစ်ကိုယ်ကောင်းသမားမဟုတ်ကြောင်း ပြောကြားခဲ့ခြင်း ဖြစ်သည်။
လီဝန်ဒေါစကီးက “ကျွန်တော်က တစ်ကိုယ်ကောင်းသမား မဟုတ်ပါဘူး။ ဘိုင်ယန်မှာ ကျွန်တော်ရရှိခဲ့တာ တွေကို သိပြီး အဲဒီအတွက်လည်း အသိအမှတ်ပြုပါတယ်။ ပြီးခဲ့တဲ့ (၈)နှစ်အတွင်းကလပ်နဲ့ ပရိသတ်တွေ စိတ်မပျက်ရအောင် ကျွန်တော် အစွမ်းကုန်ကြိုးစားခဲ့ပါတယ်။ အခုက ကျွန်တော့်အတွက် ခြေလှမ်းသစ် စတင်ရမယ့်အချိန်ပါပဲ။ အသင်းနဲ့ စာချုပ်သက်တမ်းရှိနေပေမဲ့ ကျွန်တော် ဘယ်လိုခံစားရတယ်ဆိုတာကို အသင်းသိအောင် ပြောဆိုထားတာပါ။ ဒီလိုမဟုတ်ဘူးဆိုရင် ပရိသတ်တွေအတွက် တရားမျှတမှု မရှိဘူးလို့ ခံစားရမှာပါ” ဟု ပြောကြားခဲ့သည်။
လီဝန်ဒေါစကီးသည် ၂၀၁၄ တွင် ဘိုင်ယန်မြူးနစ်အသင်းသို့ ရောက်ရှိလာခဲ့ပြီး ပြိုင်ပွဲစုံ (၃၇၅)ပွဲတွင် (၃၄၄) ဂိုး သွင်းယူခဲ့သည်။ ၎င်းသည် ယခုနွေရာသီအပြောင်းအရွှေ့တွင် စပိန်ထိပ်သီး ဘာစီလိုနာအသင်းသို့ ပြောင်းရွှေ့ လိုနေကြောင်း သိရှိရသည်။
