ဘိုင်ယန်မြူးနစ်အသင်းဥက္ကဋ္ဌ ရူမင်နစ်ဂီက စပိန်ကွင်းလယ်လူ သီယာဂိုသည် အသင်းမှထွက်ခွာမည်ဖြစ်ကြောင်း အတည်ပြုပြောကြားခဲ့သည်။
အသက် (၂၉)နှစ်အရွယ်ရှိ စပိန်ကွင်းလယ်လူ သီယာဂိုသည် ၂၀၁၃ ခုနှစ်တွင် ဘာစီလိုနာအသင်းမှ ဘိုင်ယန်မြူးနစ်ထံသို့ ပြောင်းရွှေ့လာသူဖြစ်ပြီး အသင်းနှင့် စာချုပ်သက်တမ်းတစ်နှစ်သာ ကျန်ရှိတော့သူဖြစ်သည်။
ဘိုင်ယန်မြူးနစ်အသင်းသည် သီယာဂိုအား စာချုပ်သက်တမ်းတိုးရန် ကြိုးစားခဲ့သော်လည်း ကစားသမားဘက်က ပယ်ချခဲ့ပြီး စိန်ခေါ်မှုသစ်များအတွက် အသင်းပြောင်းရွှေ့ကစားရန် ဆန္ဒပြင်းပြနေကြောင်း သိရသည်။
ရူမင်နစ်ဂီက “စာချုပ်ကိစ္စအတွက် အသင်းအားကစားဒါရိုက်တာ ဆာလီဟာမစ်ဇစ်နဲ့ သီယာဂိုတို့ ဆွေးနွေးခဲ့ကြပါတယ်။ ဒါပေမဲ့ သီယာဂိုက သူ့အနေနဲ့ စိန်ခေါ်မှုအသစ်တွေကို ရင်ဆိုင်ချင်တယ်လို့ ပြောပါတယ်။ ဒါကို ကျွန်တော်တို့ လက်ခံရမှာပါ။ သီယာဂိုက အသင်းနဲ့ စာချုပ်သက်တမ်း တစ်နှစ်ကျန်ရှိသေးပြီး သူ့အတွက် ထိုက်တန်ကြေးနဲ့ ကမ်းလှမ်းလာမယ်ဆိုရင် ကျွန်တော်တို့ လက်ခံစဉ်းစားသွားမှာပါ။ သီယာဂိုရဲ့ ဆုံးဖြတ်ချက်ကို ကျွန်တော်တို့ နားလည်ပါတယ်။ သူက ထိပ်တန်းကစားသမားတစ်ဦးဖြစ်ပြီး အသင်းအတွက် သူ စွမ်းဆောင်ပေးခဲ့တာတွေကို ကျွန်တော်တို့ မမေ့ပါဘူး”ဟု ပြောကြားခဲ့သည်။
သီယာဂိုအား ခေါ်ယူရန် ပရီးမီးယားလိဂ်ချန်ပီယံ လီဗာပူးလ်အသင်းက စိတ်ဝင်စားနေသည်ဟု သတင်းများ ထွက်ပေါ်နေသော်လည်း သီယာဂိုအတွက် ကမ်းလှမ်းမှုမရှိကြောင်း ဘိုင်ယန်မြူးနစ်အသင်းက အတည်ပြုထားသည်။
ဘိုင်ယန်မြူးနစ်အသင်းသည် သီယာဂိုအတွက် ပေါင်သန်း (၃၀) အလိုရှိနေပြီး လီဗာပူးလ်အသင်းက ပေါင် (၁၈)သန်းသာ ပေးချေလိုနေကြောင်း ဗြိတိန်သတင်းစာ Daily Mail က ဖော်ပြခဲ့သည်။
