PSG အသင်းသည် အသင်းတိုက်စစ်မှူး ဘာပေ၏နေရာတွင် အစားထိုးရန်အတွက် အဲဗာတန်တိုက်စစ်မှူး ရစ်ချာလီဆန်ကို ခေါ်ယူရန် စီစဉ်နေကြောင်း ESPN သတင်းဌာနက ဖော်ပြခဲ့သည်။
ပြင်သစ်တိုက်စစ်မှူး ဘာပေသည် ယခုနွေရာသီအပြောင်းအရွှေ့စျေးကွက်မပိတ်သိမ်းခင် ရီးယဲလ်အသင်းသို့ ပြောင်းရွှေ့ရန် စီစဉ်နေပြီး PSG နှင့် ရီးယဲလ်အသင်းတို့အကြား ပြောင်းရွှေ့ကြေး ညှိနှိုင်းရန်သာ ကျန်ရှိတော့ကြောင်း ဥရောပမီဒီယာများက ဖော်ပြနေကြသည်။
PSG အသင်းသည် ဘာပေ ထွက်ခွာသွားပါက ၎င်း၏နေရာတွင် အစားထိုးရန်အတွက် ဘရာဇီးလ်တိုက်စစ်ကစားသမား ရစ်ချာလီဆန်ကို ခေါ်ယူရန် ဆွေးနွေးမှုများပင် စတင်နေပြီဖြစ်ကြောင်း သိရသည်။
ESPN ၏ ဖော်ပြချက်အရ ရစ်ချာလီဆန်၏ အေးဂျင့်ဖြစ်သူသည် လက်ရှိတွင် ပါရီမြို့သို့ ရောက်ရှိနေပြီ အပြောင်းအရွှေ့အတွက် PSG အသင်းတာဝန်ရှိသူများနှင့် ဆွေးနွေးနေကြောင်း သိရှိရသည်။
သို့သော် ရစ်ချာလီဆန်၏အပြောင်းအရွှေ့မှာ ဘာပေအနေဖြင့် ရီးယဲလ်အသင်းသို့ ပြောင်းရွှေ့မှသာ ဖြစ်နိုင်ဖွယ်ရှိကြောင်း လည်း ESPN သတင်းဌာနက ဖော်ပြခဲ့သည်။
