ဘာစီလိုနာသို့ ပြန်လာခွင့်ရသည့်အတွက် အလွန်ပျော်ရွှင်မိကြောင်းနှင့် အသင်းအတွက် ရာနှုန်းပြည့်ပေးဆပ်သွားမည်ဟု ထရာအိုရေးဆို

ဝုလ်ဗ်အသင်းမှ ဘာစီလိုနာအသင်းသို့ ယခုရာသီကုန်အထိ အငှားစာချုပ်ဖြင့်ပြောင်းရွှေ့လာခဲ့သည့် (အငှားစာချုပ်သက်တမ်းကုန်ဆုံးချိန်တွင် ယူရိုသန်း ၃၀ ဝန်းကျင်ဖြင့် အပြီးသတ်ခေါ်ယူခွင့်ပါဝင်) စပိန်လက်ရွေးစင် တောင်ပံကစားသမား အဒါမာထရာအိုရေးက မိမိအနေဖြင့် ဘာစီလိုနာသို့ ပြန်လည်ပြောင်းရွှေ့ခွင့်ရသည့်အတွက် အလွန်ပျော်ရွှင်မိကြောင်းပြောကြားခဲ့သည်။

ဘာစီလိုနာအသင်း၏ လာမာစီယာအကယ်ဒမီထွက်ကစားသမားဖြစ်သူ ထရာအိုရေး (၂၆ နှစ်)သည်၂၀၁၃ ခုနှစ်မှ ၂၀၁၅ ခုနှစ်အထိ ဘာစီလိုနာအသင်းကြီးတွင် ပါဝင်ခွင့်ရခဲ့သော်လည်း ပွဲကစားခွင့်မရခဲ့ဘဲ ၂၀၁၅ ခုနှစ်တွင် အက်စတွန်ဗီလာအသင်းထံ ယူရို (၁၀)သန်းဖြင့် ပြောင်းရွှေ့ခဲ့သူဖြစ်သည်။

ထို့နောက်ထရာအိုရေးသည် ၂၀၁၈ ခုနှစ်မှစတင်ကာ ၂၀၂၂ ခုနှစ်အထိ ဝုလ်ဗ်အသင်းတွင်ကစားကာ ခြေစွမ်းပြနိုင်ခဲ့ပြီး ယခုအခါ၎င်း၏အသင်းဟောင်း ဘာစီလိုနာထံ ပြန်လည်ပြောင်းရွှေ့နိုင်ခဲ့ပြီဖြစ်သည်။

ဘာစီလိုနာသို့ ပြောင်းရွှေ့နိုင်ခဲ့ ခြင်းနှင့်ပတ်သက်ပြီး ထရာအိုရေးက ”ဒီနေရာ (ဘာစီလိုနာအသင်း)ကိုပြန်ရောက်ခွင့်ရခဲ့တဲ့အတွက် ကျွန်တော် အလွန်ပျော်ရွှင်မိပါတယ်။ ကျွန်တော် ဒီနေရာမှာ အကြာကြီးရှိခဲ့ဖူးတာပါ။ လက်ရှိအခြေအနေဟာ ကျွန်တော့်အတွက် အလွန်ထူးခြားတဲ့ အခိုက်အတန့်ဖြစ်ပြီး ဘာစီလိုနာအသင်းအတွက် (၁၀၀%)အပြည့်အဝပေးဆပ်သွားမှာပါ”ဟု Barca TV သို့ ဖြေကြားခဲ့သည်။