ဘာစီလိုနာအသင်းကို အကျႌရင်ဘတ်စပွန်ဆာပေးရန် Spotify က စီစဉ်နေပြီး တစ်နှစ်ယူရို (၇၅)သန်းအထိ သုံးစွဲရဖွယ်ရှိကြောင်း သိရသည်။
ဘာစီလိုနာအသင်းနှင့် လက်ရှိအချိန်တွင် အကျႌရင်ဘတ်စပွန်ဆာပေးထားသည့် ဂျပန်ကုမ္ပဏီ Rakuten တို့ကြားစာချုပ်သက်တမ်းမှာ လာမည့်ဇွန်လ (၃၀)ရက်တွင် ကုန်ဆုံးမည်ဖြစ်ပြီး Spotify အပြင် အစ္စရေးနည်းပညာကုမ္ပဏီ Vegan Nations ကလည်း စိတ်ဝင်စားနေသည်။
ဘာစီလိုနာအသင်းဥက္ကဋ္ဌ လာပေါ်တာသည် လက်ရှိအကျႌရင်ဘတ်စပွန်ဆာ Rakuten နှင့် ဆက်ပြီးလက်မတွဲလိုတော့ဘဲ စပွန်ဆာကြေးပိုမိုရရှိမည့် ကမ်းလှမ်းမှုအသစ်များ မျှော်လင့်လျက်ရှိသည်။
Spotify သည် လက်ရှိအချိန်တွင် ကမ္ဘာတစ်ဝန်းသုံးစွဲသူများစွာဖြင့် အောင်မြင်မှုများ ပိုင်ဆိုင်ထားသော်လည်း ဘာစီလိုနာအသင်းအမှတ်တံဆိပ်ကို အသုံးချ၍ စျေးကွက်ချဲ့ထွင်ရန် ဆန္ဒရှိနေသလို၊ လူသိနည်းသေးသည့် Vegan Nations ကလည်း Spotify နှင့်အပြိုင် ကမ်းလှမ်းမှုများပြုလုပ်သွားရန် ဆန္ဒရှိနေခြင်းဖြစ်သည်။
သို့သော် Vegan Nations ဘက်မှ စပွန်ဆာကြေးမည်မျှဖြင့် ကမ်းလှမ်းထားသည်ကို မသိရှိရသေးဘဲ Spotify သည် တစ်နှစ်လျှင် ယူရိုသန်း (၃၀)မှ (၆၀)ကြားဖြင့် ကမ်းလှမ်းထားကြောင်း သတင်းများ ထွက်ပေါ်နေသည်။
သို့သော် ဘာစီလိုနာအသင်းဘက်က စံချိန်တင်အကျႌရင်ဘတ်စပွန်ဆာတစ်ခုဖြစ်လာရန် မျှော်လင့်နေပြီး တစ်နှစ်လျှင် ယူရို (၇၅)သန်းအထိ အလိုရှိနေကြောင်း သိရသည်။
အဆိုပါကုမ္ပဏီ (၂)ခုအပြင် အမေရိကန်အိတ်ချိန်းကုမ္ပဏီ Polkadot နှင့် တရုတ်ဆော့ဖ်ဝဲလ်ကုမ္ပဏီ Tencent တို့ကလည်း ဘာစီလိုနာအသင်းကို အကျႌရင်ဘတ်စပွန်ဆာပေးရန် စိတ်ဝင်စားနေကြောင်း စပိန်မီဒီယာများက ဖော်ပြခဲ့သည်။
ဘာစီလိုနာအသင်းသည် မူလက အကျႌရင်ဘတ်စပွန်ဆာမထားရှိဘဲ ပြိုင်ပွဲကစားခဲ့သော်လည်း ဆန်ဒရိုရိုဆဲလ် အသင်းဥက္ကဋ္ဌဖြစ်လာသည့် ၂၀၁၀ ခုနှစ်၊ ဒီဇင်ဘာလ နောက်ပိုင်းမှ စတင်၍ အကျႌရင်ဘတ်စပွန်ဆာ ထားရှိလာခဲ့သည်။
ဆန်ဒရိုရိုဆဲလ်သည် စပွန်ဆာကြေးမယူဘဲ အခမဲ့ထားရှိသည့် အကျႌရင်ဘတ်စပွန်ဆာ Unicef နေရာတွင် ကာတာဖောင်ဒေးရှင်းနှင့် အစားထိုးခဲ့ခြင်းဖြစ်သည်။
ထို့နောက် ကာတာလေကြောင်းလိုင်းနှင့် Rakuten တို့က ဘာစီလိုနာကို အကျႌရင်ဘတ်စပွန်ဆာပေးခဲ့သည်။
