စပါးအသင်းနည်းပြ မော်ရင်ဟိုက မန်ယူအသင်းကွင်းလယ်လူ ဘရူနိုဖာနန်ဒက်စ်အား ကမ္ဘာပေါ်တွင် အကောင်းဆုံးပယ်နယ်တီကန်သွင်းသူများထဲမှ တစ်ဦးဟုဆိုကာ ယခုရာသီ ပရီးမီးယားလိဂ်ပြိုင်ပွဲတွင် မန်ယူအသင်း၏ စံချိန် တင်ပယ်နယ်တီရရှိမှုကို ပြက်ရယ်ပြုခဲ့သည်။
မန်ယူအသင်းသည် ယခုရာသီ ပရီးမီးယားလိဂ်ပြိုင်ပွဲတွင် ပယ်နယ်တီကန်သွင်းခွင့် (၁၄) ကြိမ်အထိရရှိခဲ့ပြီး ယင်းမှာ ပြိုင်ပွဲသမိုင်းတစ်လျှောက် တစ်ရာသီအတွင်း ပယ်နယ်တီရရှိမှု အများဆုံးအဖြစ် မှတ်တမ်းဝင်ခဲ့သည်။
မန်ယူအသင်းသည် ယခုရာသီအစပိုင်းတွင် ရုန်းကန်ခဲ့ရသော်လည်း ဇန်နဝါရီအပြောင်းအရွှေ့ကာလအတွင်း ဘရူနိုဖာနန်ဒက်စ် ရောက်ရှိလာပြီးနောက် ရလဒ်များ ကောင်းမွန်ခဲ့သည်။
ထို့ပြင် Restart ကာလအတွင်း ကစားခဲ့သည့် ပရီးမီးယားလိဂ်ပွဲစဉ် (၉)ပွဲတွင် ရှုံးပွဲလုံးဝမရှိခဲ့ဘဲ (၆) ပွဲအထိ အနိုင်ရကာ (၃)ပွဲသရေကျခဲ့သည်။
ထို့ကြောင့် မန်ယူအသင်းသည် ၂၀၁၉-၂၀ ပရီးမီးယားလိဂ်ရာသီသိမ်းချိန်တွင် ရမှတ် (၆၆)မှတ် ဖြင့် အဆင့် (၃)ရရှိကာ လာမည့်ရာသီတွင် ချန်ပီယံလိဂ်ပြိုင်ပွဲဝင်ခွင့် ရရှိခဲ့သည်။
မော်ရင်ဟိုသည် သူနှင့် တစ်နိုင်ငံတည်းသား ဘရူနို်ဖာနန်ဒက်စ်၏ စွမ်းဆောင်ရည်ကို အသိအမှတ်ပြုခဲ့သော်လည်း နောက်ဆုံးတွင် သူကိုင်တွယ်ခဲ့သည့် အသင်းဟောင်း မန်ယူကို ပြက်ရယ်ပြုခဲ့ခြင်းဖြစ်သည်။
မော်ရင်ဟိုက ”ဘရူနို မန်ယူ ရောက်လာတယ်။ သူ အသင်းနဲ့ အံဝင်ပြီး ကောင်းကောင်းကစားနိုင်တယ်။ သူ့ကြောင့် မန်ယူအသင်း အတော်လေးတိုးတက်ခဲ့ပါတယ်။ ပြီးတော့ သူက ကမ္ဘာပေါ်မှာ ပယ်နယ်တီကန်သွင်းမှု အကောင်းဆုံးတွေထဲက တစ်ဦး ဆိုတာကို သက်သေပြနိုင်ခဲ့တယ်။ ဘာလို့လဲဆိုတော့ သူက ပယ်နယ်တီ အလုံး(၂၀)လောက် ကန်ခွင့်ရခဲ့လို့ပါပဲ”ဟု ပြောကြားခဲ့သည်။
ဘရူနိုဖာနန်ဒက်စ်သည် မန်ယူအတွက် ယခုရာသီ ပရီးမီးယားလိဂ်တွင် (၈)ဂိုးသွင်းယူခဲ့ရာ (၄)ဂိုးမှာ ပယ်နယ်တီမှတစ်ဆင့် သွင်းယူခဲ့ခြင်းဖြစ်သည်။
