အင်္ဂလန်နှင့် မန်ယူကစားသမားဟောင်း ဒေးဗစ်ဘက်ခမ်၏ ဒုတိယသားဖြစ်သူ ရိုမီယိုဘက်ခမ်သည် အင်တာမိုင်ယာမီအရန်အသင်းနှင့် ပရော်ဖက်ရှင်နယ်စာချုပ် ချုပ်ဆိုလိုက်ကြောင်း သိရသည်။
ရိုမီယိုသည် ပြီးခဲ့သည့် စက်တင်ဘာ(၁)ရက်နေ့က အသက်(၁၉) နှစ်ပြည့်ခဲ့သူဖြစ်ပြီး မေဂျာလိဂ်ထက် နှစ်ဆင့်နိမ့်သော USL League One ကလပ် Fort Lauderdale CF အသင်းနှင့် စာချုပ်ချုပ်ဆိုခဲ့ခြင်း ဖြစ်သည်။
ယင်းအသင်းသည် ဒေးဗစ်ဘက်ခမ် ပူးတွဲပိုင်ဆိုင်သည့် အင်တာမိုင်ယာမီအသင်း အခြေစိုက်ရာမြို့မှ ဖြစ်ပြီး ၎င်းတို့၏ အိမ်ကွင်းကို အင်တာမိုင်ယာမီအသင်းနှင့်အတူ ပူးတွဲအသုံးပြုလျက်ရှိသည်။
ထို့ကြောင့် အင်တာမိုင်ယာမီအသင်း၏ မိတ်ဖက်ကလပ်ဖြစ်သလို၊ အရန်အသင်းအဖြစ်လည်း ရပ်တည်နေသည့် Fort Lauderdale CF အသင်းနှင့် ရိုမီယို စာချုပ်ချုပ်ဆိုခဲ့ခြင်းဖြစ်ပြီး ယင်းအသင်းတွင် အင်တာမိုင်ယာမီနည်းပြ ဖီးလ်နဗီးလ်၏ သားဖြစ်သူ ဟာဗေးနဗီးလ်လည်း ပါဝင်ကစားနေကြောင်း သိရသည်။
ရိုမီယိုသည် တိုက်စစ်နှင့် ခံစစ် နေရာစုံ၌ ကစားနိုင်သူဖြစ်ပြီး ယင်းအသင်းတွင်သာမက အင်တာမိုင်ယာမီအသင်းတွင်ပါ လေ့ကျင့်မှုများ ပြုလုပ်ခဲ့ပြီးနောက် (၁၉)နှစ်ပြည့်မြောက်ချိန်တွင် ပရော်ဖက်ရှင်နယ်စာချုပ် ချုပ်ဆိုခဲ့ခြင်ဖြစ်ကြောင်း သိရသည်။
ရိုမီယိုက ယခုစာချုပ်ချုပ်ဆိုခဲ့သည့် သတင်းကို Instagram တွင် ဖော်ပြခဲ့ရာ မိခင်ဖြစ်သူ ဗစ်တိုးရီးယားက ”ငါ တို့ မင်းအတွက် အလွန်ဂုဏ်ယူပါတယ်”ဟု ရေးသားခဲ့သည်။
