ဗြိတိန်တွင် COVID-19 ရောဂါဖြစ်ပွားမှုနှုန်း အလွန်မြင့်တက်နေသဖြင့် လီဗာပူးလ်နှင့် အဲဗာတန်တို့မှလွဲ၍ ကျန်ပရီးမီးယားလိဂ်ကလပ်များ ပရိသတ်ကြည့်ရှုခွင့် ပြန်လည်ပိတ်ပင်ခံရ

ဗြိတိန်နိုင်ငံတစ်ဝန်းတွင် COVID-19 ရောဂါဖြစ်ပွားမှုနှုန်း အလွန်မြင့်တက်နေသဖြင့် မာဆေးဆိုက်ကလပ် လီဗာပူးလ်နှင့် အဲဗာတန်အသင်းတို့မှလွဲ၍ ကျန်ပရီးမီးယားလိဂ်ကလပ်များမှာ ပရိသတ်ကြည့်ရှုခွင့် ပြန်လည်ပိတ်ပင်ခံခဲ့ရကြောင်း သိရသည်။

စနေနေ့တွင်ကစားမည့် Boxing Day ပွဲစဉ်များမှစ၍ ကလပ်အသင်းများအတွက် ကန့်သတ်ချက်အသစ်ကို ဗြိတိန်အစိုးရက ထုတ်ပြန်ရာတွင် လန်ဒန်အပါအဝင် အင်္ဂလန်နိုင်ငံအရှေ့ပိုင်း၊ အရှေ့တောင်ပိုင်း၊ အနောက် တောင်ပိုင်းဒေသများအား COVID-19 ရောဂါကူးစက်နိုင်ခြေ အလွန်မြင့်မားသည့် Tier 4 အဖြစ် သတ်မှတ်လိုက်သောကြောင့် ပရိသတ်ကြည့်ရှုခွင့် ပြန်လည်ပိတ်ပင်ခဲ့ရခြင်း ဖြစ်သည်။

ဗြိတိန်ကျန်းမာရေးဝန်ကြီး မတ်ဟန်ကော့၏ ပြောကြားမှုအရ ပြီးခဲ့သည့်ရက်သတ္တပတ်အတွင်း နိုင်ငံတစ်ဝန်း COVID-19 အတည်ပြုလူနာတွေ့ရှိမှုနှုန်းမှာ (၅၇) ရာခိုင်နှုန်းအထိ မြင့်တက်လာပြီး ဆေးရုံများတွင် လက်ခံကုသပေးရသည့်အခြေအနေမှာလည်း ဧပြီနောက်ပိုင်း အမြင့်ဆုံးဖြစ်လာကြောင်း သိရသည်။

ဗြိတိန်အစိုးရသည် ဒီဇင်ဘာ (၃) ရက်မှစ၍ အားကစားပြိုင်ပွဲများ၌ ပရိသတ်များ ပြန်လည်ကြည့်ရှုရန် Tier (အလွှာ) ခွဲခြား သတ်မှတ်၍ ခွင့်ပြုပေးထားပြီး Tier 2 တွင် ပါဝင်သည့် လန်ဒန်နှင့် မာဆေးဆိုက်ကလပ်များမှာ ပရိသတ် (၂ဝဝဝ) ကြည့်ရှုခွင့်ရထားသည်။

သို့သော် ဗုဒ္ဓဟူးနေ့တွင် အသစ်ထုတ်ပြန်လိုက်သည့် သတ်မှတ်ချက်အရ Boxing Day ပွဲစဉ်များမှစ၍ Tier 2 အဖြစ် ဆက်လက်သတ်မှတ်ခံထားရသည့် မာဆေးဆိုက်အခြေစိုက် လီဗာပူးလ်နှင့် အဲဗာတန်အသင်းတို့မှလွဲ၍ ကျန်ပရီးမီးယားလိဂ်ကလပ်များ မှာ ပရိသတ်ကြည့်ရှုခွင့်ရတော့မည်မဟုတ်ကြောင်း သိရသည်။

Tier 2 အဖြစ် သတ်မှတ်ခံရသည့်ဒေသများတွင် လိဂ်ချန်ပီယံရှစ်ကလပ် ဘုန်းမောက်အပါအဝင် ကာလီဆေး၊ ပလိုင်းမောက်၊ အိတ်စတာ၊ ရှရူးဘူရီ၊ ဟာရိုဂိတ်နှင့် ထရန်မဲရိုဗာစသည့် အောက်တန်းလိဂ်ကလပ် (၇)သင်းပါဝင်ပြီး ၎င်းတို့အနေဖြင့် ပရိသတ် (၂ဝဝဝ) ဆက်လက်ကြည့်ရှုခွင့် ရမည်ဖြစ်သည်။

ထို့ပြင် Tier 4 ဒေသတွင် ပါဝင်နေသည့် ပရီးမီးယားလိဂ်ကလပ်များမှ ကစားသမားများအနေဖြင့် COVID-19 ရောဂါစစ်ဆေးမှုကို တစ်ပတ်လျှင် နှစ်ကြိမ်ပြုလုပ်ရဖွယ်ရှိနေကြောင်း သိရသည်။

ပရီးမီးယားလိဂ်သည် ဇွန်လအတွင်း ဘောလုံးပွဲများ တစ်ကျော့ပြန် စတင်ကျင်းပစဉ် COVID-19 ရောဂါ စစ်ဆေးမှုကို တစ်ပတ်နှစ်ကြိမ်ပြုလုပ်ခဲ့သော်လည်း ယခုရာသီမှစ၍ တစ်ပတ်တစ်ကြိမ်သာ စစ်ဆေးလျက်ရှိသည်။

သို့သော် လက်ရှိအခြေအနေအရ Tier 4 ဒေသမှ ကစားသမားများအား တစ်ပတ်နှစ်ကြိမ်စစ်ဆေးရန် မကြာမီဆုံးဖြတ်ဖွယ်ရှိပြီး ဇန်နဝါရီမှစ၍ ကလပ်အသင်းအားလုံး အပိုစစ်ဆေးမှုများ ပြုလုပ်ရဖွယ်ရှိကြောင်း သိရသည်။ တနင်္လာနေ့က ထုတ်ပြန်သည့်ရလဒ်အရ ပရီးမီးယားလိဂ် ကစားသမားနှင့် ဝန်ထမ်း (၁၅၆၉) ဦးကို COVID-19 ရောဂါ စစ်ဆေးရာ ခုနစ်ဦးတွင် Positive တွေ့ရှိခဲ့ပြီး မည်သူမည်ဝါဖြစ်သည် ကိုမူ ထုတ်ပြန်ခြင်းမရှိကြောင်း သိရသည်။