ဘိုင်ယန်မြူးနစ်အသင်းသည် လာမည့်နွေရာသီတွင် ရီးယဲလ်အသင်းနှင့် စာချုပ်သက်တမ်းကုန်ဆုံးမည့် တောင်ပံကစားသမား ဗက်ဇ်ကေးကို ခေါ်ယူနိုင် ရန် အလားအလာအကောင်းဆုံးဖြစ်နေကြောင်း သိရသည်။
အသက် (၂၉)နှစ်အရွယ်ရှိ စပိန်တောင်ပံကစားသမား ဗက်ဇ်ကေးသည် ယခုရာသီကုန်တွင် ရီးယဲလ်အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး စာချုပ်သစ်အတွက် ဆွေးနွေးမှုမရှိသေးကြောင်း သိရသည်။
ထို့ကြောင့် ဗက်ဇ်ကေးအနေဖြင့် လာမည့်နွေရာသီတွင် အသင်းမှ ပြောင်းရွှေ့ကြေးအလွတ်ဖြင့် ထွက်ခွာဖွယ်ရှိနေပြီး ၎င်းကို ခေါ်ယူရန် ပရီးမီးယားလိဂ်ကလပ်များဖြစ်သည့် စပါးနှင့် အဲဗာတန်အသင်းတို့ကလည်း စိတ်ဝင်စားနေကြောင်း သိရှိရသည်။
သို့သော် ဗက်ဇ်ကေးသည် ဆုဖလားများ ရရှိရန်အတွက် အာမခံချက်ပိုရှိသည့် ဘိုင်ယန်မြူးနစ်အသင်းကို ဦးစားပေးရွေးချယ် ဖွယ်ရှိကြောင်း AS က ဖော်ပြခဲ့သည်။
ဗက်ဇ်ကေးသည် ရီးယဲလ်အသင်းအတွက် (၆)ရာသီအတွင်း ပြိုင်ပွဲစုံ (၂၃၇)ပွဲကစားပြီး (၂၆)ဂိုးသွင်းယူပေးထားကာ အသင်းနှင့်အတူ ချန်ပီယံလိဂ်ဖလား (၃)ကြိမ်၊ လာလီဂါချန်ပီယံဆု (၂)ကြိမ်အပါအဝင် ဆုဖလား (၁၂)လုံးအထိ ရယူထားသည်။
