လက်စတာအသင်းနည်းပြ ဘရန်ဒန်ရော်ဂျာက အသင်းနောက်ခံလူ ဖိုဖာနာအတွက် ပေါင်သန်း (၇၀)တန်ကြေးရှိသည့် ချယ်လ်ဆီးအသင်း၏ တတိယအကြိမ်မြောက်ကမ်းလှမ်းမှုကို ပယ်ချခဲ့ကြောင်း သြဂုတ်(၂၄)ရက်တွင် အတည်ပြုပြောကြားခဲ့သည်။
ချယ်လ်ဆီးနည်းပြ တူဟယ်လ်သည် အသင်း၏ခံစစ်ပိုင်းအတွက် အသက် (၂၁)နှစ်အရွယ် ဖိုဖာနာကို ခေါ်ယူရန်အလိုရှိနေကြောင်း သိရသည်။
ထို့ကြောင့် ချယ်လ်ဆီးအသင်းသည် ပြီးခဲ့သည့်ရက်ပိုင်းက ဖိုဖာနာအတွက် ပေါင်သန်း (၇၀) တန်ကြေးရှိသည့် ပမာဏတစ်ရပ်ဖြင့် ကမ်းလှမ်းခဲ့ကြောင်း Daily Mail အပါအဝင် ဗြိတိန်မီဒီယာများက ဖော်ပြခဲ့ကြသည်။
သို့သော် လက်စတာနည်းပြ ဘရန်ဒန်ရော်ဂျာက ”ဖိုဖာနာအတွက် ကမ်းလှမ်းမှုတွေရှိပေမဲ့ ကျွန်တော်တို့ ပယ်ချခဲ့ပါတယ်။ ကျွန်တော် ဒီထက်ပိုပြီး တခြားအသေးစိတ်အချက်တွေကို မပြောနိုင်ပါဘူး။ လောလောဆယ်မှာ ပွဲတွေအတွက်ပဲ အာရုံစိုက်ထားပါတယ်”ဟု ပြောကြားခဲ့သည်။
လက်စတာအသင်းသည် အသင်းနှင့် ၂၀၂၇ အထိ စာချုပ်သက်တမ်းရှိနေသည့် ဖိုဖာနာကို နောက်ခံလူတစ်ဦးအတွက် ကမ္ဘာ့စံချိန်တင်ပြောင်းရွှေ့ကြေး ပေါင် (၈၅)သန်းထိ အလိုရှိနေကြောင်း သိရှိရသည်။
ထို့ကြောင့် ချယ်လ်ဆီးအနေဖြင့် ၎င်းကို ခေါ်ယူမည့်အစီအစဉ်ကို လက်လျှော့ ဖွယ်ရှိနေကြောင်းလည်း သိရသည်။
