မန်စီးတီးအသင်း၏ တိုက်စစ်မှူး ဟော်လန်းသည် ပြိုင်ပွဲများစွာ၌ ပွဲဦးထွက်တွင် ဂိုးသွင်းယူနိုင်သည့် မှတ်တမ်းကောင်းကို ဆက်ထိန်းနိုင်ခဲ့ပြီး ဝက်စ်ဟမ်းနှင့် ယှဉ်ပြိုင်ခဲ့သည့် ပရီးမီးယားလိဂ်ပွဲဦးထွက်တွင်လည်း (၂)ဂိုးသွင်းယူခဲ့သည်။
ဟော်လန်းသည် အဆိုပါပွဲ၌ မန်စီးတီးအသင်းရရှိသည့် (၂)ဂိုးစလုံးကို သွင်းယူပေးခဲ့ခြင်းဖြစ်ပြီး အဂွဲရိုးနောက်ပိုင်း ပရီးမီးယားလိဂ်ပွဲဦးထွက်တွင် မန်စီးတီးအတွက် (၂)ဂိုးသွင်းယူနိုင်သည့် ပထမဆုံးကစားသမားအဖြစ်လည်း မှတ်တမ်းဝင်ခဲ့သည်။ ထို့ပြင် ပရီးမီးယားလိဂ်ပွဲဦးထွက်၌ ပယ်နယ်တီရရှိအောင် စွမ်းဆောင်နိုင်ပြီး ယင်းပယ်နယ်တီကို ဂိုးဝင်အောင် သွင်းယူနိုင်ခြင်းမှာလည်း ၂၀၁၆ ခုနှစ်က ချယ်လ်ဆီးတိုက်စစ်မှူး ပါတိုနောက်ပိုင်း ပထမဆုံးကစားသမားအဖြစ် မှတ်တမ်းဝင်ခဲ့ကြောင်း Optajoe က ဖော်ပြခဲ့သည်။ ဟော်လန်းသည် ပွဲဦးထွက်၌ ဂိုးသွင်းယူနိုင်သည့်မှတ်တမ်းကို ချန်ပီယံလိဂ်၊ ဘွန်ဒစ်လီဂါ စသည့်ပြိုင်ပွဲများတွင်သာမက ဂျာမန်ဖလား၊ ဂျာမန်စူပါဖလားနှင့် နော်ဝေလိဂ်နှင့် နော်ဝေဖလားပြိုင်ပွဲများတွင်ပါ ရယူထားသူဖြစ်ကြောင်း သိရသည်။
ဟော်လန်းသည် အသက်(၁၆)နှစ်အရွယ်တွင်ပင် မိုလ်ဒီအသင်းသို့ ပြောင်းရွှေ့ခဲ့ပြီး အသင်းအတွက် ပွဲဦးထွက်ကစားသည့် နော်ဝေဖလားပြိုင်ပွဲတွင် ဂိုးသွင်းယူနိုင်ခဲ့သလို၊ နော်ဝေလိဂ်ပြိုင်ပွဲ၌ ပွဲဦးထွက်ကစားခွင့်ရချိန်၌လည်း ဂိုးသွင်းယူနိုင်ခဲ့သည်။ ထို့နောက် သြစတြီးယားကလပ် ဆာလ်ဇ်ဘာ့ဂ်အသင်းသို့ ပြောင်းရွှေ့ခဲ့ပြီး ချန်ပီယံလိဂ်ပွဲဦးထွက်အဖြစ် KRC ဂျန့်အသင်းနှင့် ယှဉ်ပြိုင်ကစားရာတွင်လည်း ဟက်ထရစ်သွင်းယူနိုင်ခဲ့သည်။
ဟော်လန်းသည် ၂၀၂၀ ဇန်နဝါရီတွင် ဒေါ့မွန်အသင်းအတွက် ဘွန်ဒစ်လီဂါပွဲဦးထွက်အဖြစ် အော့စ်ဘတ်နှင့် ရင်ဆိုင်ကစားရာတွင်လည်း ဟက်ထရစ်သွင်းယူနိုင်ခဲ့သည်။ ယင်းပွဲတွင် ဟော်လန်းသည် ဒုတိယပိုင်းရောက်မှ လူစားဝင်ခဲ့ရပြီး (၂၃)မိနစ်ဝန်းကျင်သာ ကစားခဲ့ရသော်လည်း ဟက်ထရစ်သွင်းယူနိုင်ခဲ့ခြင်းဖြစ်သည်။
ထို့ပြင် ဂျာမန်ဖလား၊ ဂျာမန်စူပါဖလားပြိုင်ပွဲများတွင်လည်း ဂိုးသွင်းယူနိုင်ခဲ့ပြီး လီဗာပူးလ်နှင့် ယှဉ်ပြိုင်ကစားခဲ့သည့် ကွန်မြူနတီဒိုင်းတွင်မူ ဂိုးသွင်းယူနိုင်ခြင်း မရှိခဲ့ပေ။
သို့သော် ယခုရရှိထားသည့် မှတ်တမ်းသည်ပင် အခြားကစားသမားများ ရယူနိုင်ရန် မလွယ်ကူသည့် ထူးခြားမှတ်တမ်းဖြစ်နေသည်။ ဟော်လန်းသည် ယခုရာသီမှ ပရီးမီးယားလိဂ်သို့ ရောက်ရှိလာသည့် ကစားသမားသစ်ဖြစ်သော်လည်း ဂိုးသွင်းဘုရင်ဆုရယူနိုင်ရန် ရေပန်းအစားဆုံးဖြစ်နေသည်။ ဟော်လန်းသည် ပွဲဦးထွက်ဂိုးသွင်းမှတ်တမ်းကောင်းများ ပိုင်ဆိုင်ထားသော်လည်း ဂိုးသွင်းဘုရင်ဆုကိုမူ ၂၀၂၀-၂၁ ရာသီက ချန်ပီယံလိဂ်ပြိုင်ပွဲတွင်သာ ရယူနိုင်ခဲ့ကြောင်း သိရသည်။
