မနေ့ည က ကစားခဲ့တဲ့ အင်္ဂလန် – ဒိန်းမတ် ဥရောပ နေရှင်လိဂ် အုပ်စုပွဲစဉ် မှာ ချဲလ်ဆီး အသင်း ရဲ့ အသက် ၂၀ အရွယ် ညာနောက်ခံလူ ရိစ်ဂျိမ်းစ် ဟာ အင်္ဂလန် လက်ရွေးစင် အသင်း အတွက် ပထမဆုံး ပွဲထွက်ခွင့် ကို စတင် ရရှိခဲ့ပါတယ် ။
၎င်း ပွဲထွက်ခွင့် ရခဲ့တဲ့ ပွဲမှာမှ အင်္ဂလန် အသင်း ဟာ ဒိန်းမတ် အသင်း ကို ခရစ်တီယန် အဲရစ်ဆင် ရဲ့ တလုံးတည်းသော ပင်နယ်တီ သွင်းဂိုး နဲ့ အတူ အရေးနိမ့်ခဲ့ရပါတယ် ။ ဒီပွဲမှာ အင်္ဂလန် အသင်း ဟာ ပွဲချိန် ၃၁ မိနစ် မှာ ၂ဝါတနီ နဲ့ အထုတ်ခံခဲ့ရတဲ့ နောက်ခံလူ ဟယ်ရီ မက်ဂွိုင်းယား ကြောင့် လက်ကျန် ပွဲချိန် ၃ပုံ ၂ပုံ ကို ၁၀ယောက်တည်းနဲ့ ကစားခဲ့ရပါတယ် ။
ဒီ အနေအထား မှာ ရိစ်ဂျိမ်းစ် ဟာ အထူး ခြေစွမ်းပြသနိုင်ခဲ့ပေမယ့် ၊ ပွဲအပြီး မှာ ကွင်းလယ်ဒိုင် ရဲ့ အဆုံးအဖြတ်ပေးမှုတွေ အပေါ် မကျေမနပ် ဖြစ်ပြီး ၊ စောဒက တက်ခဲ့ရာက တိုက်ရိုက် အနီကတ် ပြသခံခဲ့ရပါတယ် ။ ဒါဟာ ၎င်းအဖို့ လက်ရွေးစင် ကစားသမား ဘဝ ပထမဆုံး ပွဲထွက်ခွင့် မှာ တင်ကျန်ခဲ့တဲ့ အမဲစက် တစက် လို့ ပြောရတော့မှာပါ ။
အင်္ဂလန် လက်ရွေးစင် နည်းပြ ဂါရတ် ဆောက်ဂိတ် ကတော့ ပွဲအပြီးမှာ အနီကတ် ပြသခံခဲ့ရပေမယ့် ၊ ပွဲချိန် အတွင်း က ရိစ်ဂျိမ်းစ် ရဲ့ စွမ်းဆောင်ရည် နဲ့ ပတ်သက်ပြီး အခုလိုပဲ ချီးကျူး ပြောဆိုမှု တချို့ ပြုလုပ်ခဲ့ပါတယ် ။
ဆောက်ဂိတ် က ” ဒါဟာ ( ပွဲအပြီး အနီထိခဲ့ခြင်း ) ရိစ် အတွက် သင်ယူရမယ့် သင်ခန်းစာ တရပ် ဖြစ်ပါတယ် ။ ဒါပေမယ့် သူဟာ အင်္ဂလန် လက်ရွေးစင် အသင်း အတွက် အံ့သြဖွယ် ပွဲထွက်ခွင့် ကို ပိုင်ဆိုင်ခဲ့ပါတယ် ။ ဒီတပတ်လုံး သူဟာ ကျွန်တော့ ကို အထင်ကြီးစေပါတယ် ။ ”
” အနီမထိခင် အခိုက်အတန့်် အထိ သူဟာ တပွဲလုံး မှာ ရင့်ကျက် တည်ငြိမ်တဲ့ စွမ်းဆောင်ရည် ကို ထုတ်ပြသွားခဲ့ပါတယ် ။ အဆုံးမှာ မဖြစ်သင့်တဲ့ ပုံစံ တရပ် နဲ့ အဆုံးသတ်ခဲ့ပေမယ့် ၊ ဒီတပတ်လုံး ပျမ်းမျှ စွမ်းဆောင်ရည် အရ သူ့ဆီကနေ အပေါင်း လက္ခဏာ ဆောင်တဲ့ အရိပ်အယောင် အတော်များများ တွေ့ခဲ့ရပါတယ် ။ ” လို့ ပြောကြားခဲ့ပါတယ် ။
ဒိန်းမတ် နဲ့ ပွဲမှာ အနီ ၂ကတ် ထိခဲ့တဲ့ အင်္ဂလန် အသင်း ရဲ့ စည်းကမ်းပိုင်း လိုက်နာမှုနဲ့ ပတ်သက်ပြီးလည်း ဆောက်ဂိတ် က ” ဒါဟာ ကျွန်တော်တို့ဖက်ကလည်း ထုတ်ချင်နေတဲ့ မေးခွန်း တရပ်ပါပဲ ။ ကျွန်တော် တို့ဟာ မလိုအပ်တဲ့ အပြုအမူ တွေကို ကျူးလွန်ခဲ့ကြပါတယ် ။ ”
” ရိစ်ဂျိမ်းစ် ရဲ့ အနီကတ် ကလည်း ဖြစ်ဖို့ မလိုတဲ့ အရာတခုပါ ။ မက်ဂွိုင်းယား ရဲ့ ပထမ တဝါ က မျှတမှု ရှိပေမယ့် ၊ ဒုတိယ တဝါ ကတော့ တိကျတဲ့ ဆုံးဖြတ်ချက်တော့ မဟုတ်ပါဘူး ။ ဒီ အခြေအနေတွေနဲ့ ပတ်သက်ပြီး ကျွန်တော် တို့ ပြန်ပြီး လေ့လာ သုံးသပ်ဖို့ လိုပါတယ် ။ ဘာလို့လဲ ဆိုတော့ တယောက်လျော့သွားပြီ ဆိုတာနဲ့ ခင်ဗျား အတွက် ပြိုင်ဖက် ကို ရင်ဘောင်တန်း ယှဉ်ပြိုင်ဖို့က ယေဘူယျအားဖြင့် မလွယ်ကူတော့လို့ပါ ။ ”
” အထူးသဖြင့် လက်ကျန် ပွဲချိန် က တနာရီလောက် ကျန်သေးတဲ့ အနေအထားမျိုးမှာပေါ့ ။ ” လို့ ပြောကြားခဲ့ပါတယ် ။ ဆက်လက်ပြီး ဆောက်ဂိတ် က အနီကတ် ၂ကတ် က လွဲရင် ကျန်တဲ့ ကွင်းတွင်း အသင်းလိုက် စွမ်းဆောင်ရည် အပိုင်း ကိုတော့ ကျေနပ်မှု ရှိတယ် လို့ ဆိုလာပါတယ် ။
ဆောက်ဂိတ် က ” ဒီနေ့ပွဲ စွမ်းဆောင်ရည် အတွက် ကျွန်တော်တို့ ဂုဏ်ယူရမှာပါ ။ ၁၁ယောက်ချင်း ကစားခဲ့တဲ့ အချိန်တွေမှာ ကျွန်တော်တို့ရဲ့ ကစားပုံ အရမ်း ကောင်းခဲ့သလို ၊ ညာတောင်ပံ တလျှောက် ပြိုင်ဖက် ကို မျိုးစုံ အခက်တွေ့စေခဲ့ပါတယ် ။ ”
” တယောက်လျော့သွားတာနဲ့ ပင်နယ်တီ ခွင့်ပြုလိုက်ရတာ က ဒီနေ့ပွဲကို အရာရာ ပြောင်းလဲ သွားစေခဲ့ပါတယ် ။ ပင်နယ်တီ ပေးခဲ့ရတဲ့ အနေအထား မှာဆို ဝေါ်ကာ ကို ပြိုင်ဖက် က ပြစ်ဒဏ် ကျူးလွန်ခဲ့တာ ဖြစ်ပြီး ကျွန်တော်တို့ကတောင် ပြစ်ဒဏ်ဘော ရခဲ့သင့်တာပါ ။ ဒီ အကြောင်း ကို မပြောတာ က ပိုကောင်းပါလိမ့်မယ် ။ ” လို့ ပြောကြားခဲ့ပါတယ် ။
