ပြင်သစ်အသင်းနှင့် ကစားမည့် ပွဲစဉ်မတိုင်မီ အင်္ဂလန်အသင်းနှင့်အတူ စတာလင် အချိန်မီပြန်လည် ပူးပေါင်း

အင်္ဂလန်လက်ရွေးစင်အသင်း ၏ တောင်ပံတိုက်စစ်ကစားသမားတစ်ဦးဖြစ်သူူ စတာလင်သည် မိသားစု အကြောင်းပြချက်ကြောင့် အသင်းမှ နုတ်ထွက်ကာ အင်္ဂလန်နိုင်ငံသို့ ပြန်သွားခဲ့ပြီးနောက် ယခုအချိန်တွင် ပြင်သစ်အသင်းနှင့်ပွဲအမီ အသင်းနှင့် ပြန်လည်ပူးပေါင်းခဲ့ကြောင်း သိရှိရသည်။

စတာလင်သည် မိသားစုကိစ္စကြောင့် ပြန်သွားခဲ့သည့်အတွက် ဆီနီဂေါအသင်းနှင့် ကစားခဲ့သည့်ပွဲစဉ်ကို လွဲချော်ခဲ့သည်။ 

သို့ရာတွင် အင်္ဂလန်အသင်းသည် အသင်းကောင်းတစ်သင်းဖြစ်သည့် ဆီနီဂေါအသင်းကို သက်သောင့်သက်သာ ကျော်ဖြတ်နိုင်ခဲ့သည်။ 

အင်္ဂလန်အသင်း၏ နည်းပြ ဖြစ်သူ ဆောက်ဂိတ်က စတာလင် အသင်းမှ ထွက်ခွာသွားခြင်းအပေါ် နားလည်မှု အပြည့်အဝရှိခဲ့ပြီး မိသားစု ပြဿနာသည် ဘောလုံးထက် ပိုအရေးပါသည်ဟုဆိုခဲ့ပြီး စတာလင် ပြန်လာမည့်အချိန်ကို မျှော်လင့်နေသည်ဟုလည်း ပြောကြားခဲ့သည်။

စတာလင်သည် ပြင်သစ်အသင်းနှင့် ကစားမည့်ပွဲအမီ ပြန်လည်ပူးပေါင်းခဲ့သော်လည်း ဆောက်ဂိတ်အနေဖြင့် ယင်းပွဲတွင် ပွဲထွက်အဖြစ် သုံးဖွယ်မရှိဘဲ ပုံစံကောင်းပြနေသည့် ရပ်ရှ်ဖို့ဒ်၊ ဖိုဒန်တို့ကိုသာ ဦးစားပေးဖွယ် ရှိနေသည်။