ယခုနှစ် နွေရာသီ အပြောင်းအရွှေ့ စျေးကွက်ရဲ့ Deadline Day ကို ရောက်လာချိန် ချဲလ်ဆီး အသင်းထံကနေ မနှစ်ကလို ယောက်ယက်ခတ်တဲ့ လှုပ်ရှားမှုတွေ တွေ့ရတော့မှာ မဟုတ်ပေမယ့် ၊ ကစားသမား အဝင် တဦးနဲ့ အထွက် ၂ဦးလောက် တွေ့လာရဖွယ် ရှိပါတယ် ။
တမြန်နေ့ကပဲ မန်စီးတီး အသင်းထံကနေ ပြောင်းရွှေ့ကြေး ပေါင်သန်း ၄၀ + အပိုဆုကြေး ပေါင်၅သန်းနဲ့ ခေါ်ယူဖို့ သဘောတူညီမှု ရထားတဲ့ အင်္ဂလန် ယူ၂၁ တောင်ပံကစားသမား ကိုးလ်ပါလ်မာဟာ မနေ့ကတော့ ကော့ဘ်ဟမ်း လေ့ကျင့်ရေး စင်တာမှာ ဆေးစစ်မှု ခံယူ ပြီးစီးခဲ့ပြီ ဖြစ်ပါတယ် ။
ဒီအတွက်ကြောင့် ယနေ့မှာ ပါလ်မာရဲ့ တရားဝင် အပြောင်းအရွှေ့ ကြေညာမှု ထွက်ပေါ်လာဖို့ ရှိကာ ၊ ဘယ်ကျောနံပါတ်ကို ဝတ်ဆင်မလဲ ဆိုတာကိုလည်း သိရတော့မှာ ဖြစ်ပါတယ် ။
အထွက်ဖက်မှာတော့ ကော့ဘ်ဟမ်း အကယ်ဒမီထွက် အင်္ဂလန် တောင်ပံကစားသမား ကော်လမ် ဟတ်ဒ်ဆန် အိုဒွိုင်းဟာ ယနေ့မှာပဲ နော်တင်ဟမ် ဖောရက်စ် အသင်းသို့ အပြီးသတ် ပြောင်းရွှေ့ဖို့ သဘောတူညီမှု ရသွားပြီ ဖြစ်ပါတယ် ။
ပြောင်းရွှေ့ကြေး အတိအကျတော့ မသိရပေမယ့် ၊ ပေါင် ၅သန်းကနေ ၁၀သန်း အတွင်း ရှိမယ်လို့ မျှော်မှန်းရပြီး ၊ လွန်ခဲ့တဲ့ ၂ရက်ကပဲ အိုဒွိုင်းရဲ့ အပြောင်းအရွှေ့ အတွက် ကလပ် ၂သင်း အကြား သဘောတူညီမှု ရခဲ့တာ ဖြစ်ပါတယ် ။
ဒီနွေတတွင်းမှာတော့ ရှင်းထုတ်ဖို့ ခက်တဲ့ ကစားသမား တချို့ ဖြစ်တဲ့ ရိုမီလူ လူကာကူကို ရိုးမားသို့ တရာသီ အငှား ၊ ဟာကင် ဇီယက်ခ်ျကို ဂါလာတာစာရေးသို့ တနှစ် အငှား + အပြီးသတ် ခေါ်ယူခွင့် ၊ အိုဒွိုင်းကို ဖောရက်စ်သို့ အပြီးသတ် ရောင်းချနိုင်လိုက်တာက ခြင်္သေ့ပြာတို့ အတွက် မဟာအောင်မြင်မှု တရပ်လို့ ခေါ်ဆိုရမှာ ဖြစ်ပါတယ် ။
နောက်ထပ် ချဲလ်ဆီးက ထွက်နိုင်တဲ့ ကစားသမား တယောက်ကတော့ အကယ်ဒမီထွက် အင်္ဂလန် ခံစစ်မှူး ထရက်ဗာ ချာလိုဘာ ဖြစ်ပြီး ၊ ၄င်းရဲ့ အပြောင်းအရွှေ့ကတော့ ဘိုင်ယန်မြူးနစ် အသင်းရဲ့ ကြိုးစားအားထုတ်မှု ၊ ယနေ့မှာ ၂သင်း အကြား ပြောင်းရွှေ့ကြေး ညှိနှိုင်းမှု အပေါ်မှာသာ မူတည်နေပါတယ် ။
ကစားသမားဖက်ကတော့ သူ့ကို စင်တင်ပေးခဲ့တဲ့ ချဲလ်ဆီး နည်းပြဟောင်း သောမတ်စ် တူချယ် ရှိရာ ဘိုင်ယန်သို့ ပြောင်းရွှေ့ဖို့ စိတ်အားထက်သန်နေပြီး ၊ ချဲလ်ဆီးဖက်ကတော့ ပေါင်သန်း ၄၀နဲ့ ၅၀ အကြား ကမ်းလှမ်းမှုမျိုးနဲ့ဆို လိုက်လိုက်လျောလျော လက်ခံပေးသွားဖို့ များပါတယ် ။
ဘိုင်ယန်ဟာ မနေ့ကပဲ နယ်သာလန် လူငယ် ကွင်းလယ်လူ ဂရေဗန်ဘတ်ခ်ျကို လီဗာပူးသို့ ယူရိုသန်း ၄၀နဲ့ ရောင်းချဖို့ သဘောတူညီမှု ရထားပြီး ဖြစ်တာကြောင့် ယနေ့ညမှာ ချာလိုဘာရဲ့ အပြောင်းအရွှေ့ အတွက် ချဲလ်ဆီးနဲ့ ထိပ်တိုက် ညှိနှိုင်းဖို့ ကြိုးပမ်းမှာ ဖြစ်ပါတယ် ။
မနေ့ကတော့ ချဲလ်ဆီး အကယ်ဒမီထွက် လူငယ် ကွင်းလယ်တိုက်စစ် ကစားသမား ဖော်စတီနို အန်ဂျိုရင်ဟာ လိဂ်ဝမ်းကလပ် ပို့စ်မောက် အသင်းသို့ တရာသီ အငှားထွက်သွားသလို ၊ အကယ်ဒမီထွက် လူငယ် နောက်ခံလူ ဇက်ခ်စတာ့ဂ်ျဟာလည်း ပီတာဘရော့ အသင်းသို့ တရာသီ အငှားထွက်သွားပါတယ် ။
