ပရီးမီးယားလိဂ်တာဝန်ရှိသူများသည် ယခုရာသီပရီးမီးယားလိဂ်နောက်ဆုံးပွဲစဉ်(၂)ပွဲဖြစ်သော ပွဲစဉ်(၃၇)နှင့် (၃၈)တို့တွင် ကွင်းအတွင်းသို့ ပရိသတ်များ လာရောက်ကြည့်ရှုခွင့်ရရှိရန် ကြိုးစားနေကြောင်းသိရသည်။
ဗြိတိန်အစိုးရ၏ ကိုရိုနာဗိုင်းရပ်စ် လမ်းပြမြေပုံအရ လာမည့်မေလ (၁၇) ရက်နေ့တွင် နိုင်ငံတစ်ဝန်းရှိ အားကစားကွင်းများ၌ ပရိသတ်များ အကန့်အသတ်အားဖြင့် ကြည့်ရှုခွင့်ရရှိမည်ဖြစ်သည်။
ပရီးမီးယားလိဂ်ပွဲစဉ် (၃၇)မှာ ယင်းမေလ(၁၇)ရက်နေ့မတိုင်မီ မေလ(၁၄၊ ၁၅)ရက်နေ့များတွင် ကစားမည်ဖြစ်ပြီး နောက်ဆုံးပွဲစဉ်(၃၈)မှာမူ မေလ (၂၃)ရက်နေ့တွင် ကစားမည်ဖြစ်သည်။
အစိုးရ၏သတ်မှတ်ချက်များအရဆိုလျှင် ပွဲစဉ်(၃၈)ကိုသာ ပရိသတ်များ ကွင်းအတွင်း ဝင်ရောက်ကြည့်ရှုခွင့် ရရှိမည်ဖြစ်သည်။
ဗြိတိန်အစိုးရသည်မေလ(၁၇) ရက်နေ့မှစ၍ အားကစားကွင်းများ အတွင်းသို့ ပရိသတ်(၁၀၀၀၀)(သို့ မဟုတ်) ကွင်းဝင်ဆံ့သူဦးရေ၏ (၂၅%)ကို ဝင်ခွင့်ပြုရန် စီစဉ်ထားသည်။
ထို့ ပြင်ကိုရိုနာဗိုင်းရပ်စ် လမ်းညွှန်ချက်များနှင့်အညီ ပရိသတ်များ ကွင်းအတွင်း စမ်းသပ်ဝင်ရောက် ကြည့်ရှုခွင့်ပြုသည့် Test Event ပွဲများကို ကျင်းပလိုပါက ဧပြီလနှင့်မေလအတွင်း ပရိသတ် (၂၀၀၀)အများဆုံးဝင်ခွင့်ပြု ကာစမ်းသပ်ရန်လည်း ဗြိတိန်အစိုးရကခွင့်ပြုထားသည်။
ပရီးမီးယားလိဂ်တာဝန်ရှိသူများက ယင်း Test Event ပွဲများကိုမပြုလုပ်တော့ဘဲ နောက်ဆုံးပွဲစဉ် (၂)ပွဲကိုသာ ပရိသတ်ဝင်ခွင့်ပေးရန် ဗြိတိန်အစိုးရထံ တောင်းဆိုထားကြောင်းသိရသည်။
