ပရီးမီးယားလိဂ် အသင်းကြီးများက လိုချင်နေသော အာဂျင်တိုင်းကွင်းလယ်လူ

ဘရိုက်တန်အသင်း၏ ကွင်းလယ်ကစားသမား မက်အယ်လစ်စတာကို ခေါ်ယူရန် ပရီးမီးယားလိဂ် ကလပ်အသင်းအများအပြားက စိတ်ဝင်စားနေကြသည်။

အသက် ၂၄ နှစ်အရွယ်ရှိ အာဂျင်တိုင်းကွင်းလယ်ကစားသမားကို မန်ယူ လီဗာပူးနှင့် အာဆင်နယ်အသင်းတို့ အနီးကပ်စောင့်ကြည့်နေကြသည်။ ထိုကလပ်အသင်းများအနက် နှစ်သင်းက မက်အယ်လစ်စတာကို ခေါ်ယူနိုင်ရေးအတွက် ဘရိုက်တန်ကို ဆက်သွယ်ခဲ့ကြောင်းလည်း သတင်းများက ဖော်ပြသည်။

ပြီးခဲ့သည့်ဒီဇင်ဘာလတွင် အာဂျင်တီးနားအသင်းနှင့်အတူ ကမ္ဘာ့ဖလားရရှိခဲ့သော မက်အယ်လစ်စတာကို ဇန်နဝါရီအပြောင်းအရွှေ့ကတည်းက အသင်းပြောင်းမည်ဟု သတင်းများ ထွက်ပေါ်နေခြင်းဖြစ်သည်။

မက်အယ်လစ်စတာသည် လက်ရှိဘောလုံးရာသီတွင် ဘရိုက်တန်အသင်းအတွက် အဓိက ကစားသမား တစ်ဦးအဖြစ်ကစားနေပြီး ၂၄ ပွဲကစားကာ ၈ ဂိုးသွင်းယူထားသည်။ မက်အယ်လစ်စတာသည် လာမည့် နွေရာသီအပြောင်းအရွှေ့တွင် အသင်းပြောင်းဖွယ်ရှိကြောင်းလည်း သတင်းများက သုံးသပ်ဖော်ပြကြသည်။