အာဆင်နယ်အသင်း၏ နည်းပြ ဖြစ်သူ အာတီတာသည် နော်တင်ဟမ် ဖောရက်စ်အသင်းကို ရှုံးနိမ့်ကာ FA ဖလားပြိုင်ပွဲမှ ထွက်ခွာခဲ့ရသည့်ပွဲအပြီးတွင် ကစားသမားများ၏ စွမ်းဆောင်ရည်အပေါ် ဝေဖန်ပြစ်တင်မှုများ ပြုလုပ်ခဲ့ကြောင်း သိရှိရသည်။
အာဆင်နယ်အသင်းသည် နော်တင်ဟမ်ဖောရက်စ်အသင်းနှင့် ကစားခဲ့သည့်ပွဲစဉ်တွင် (၀-၁) ဂိုးဖြင့် ရှုံးနိမ့်ခဲ့ပြီး ယင်းပွဲတွင် မိနစ် (၉၀) လုံးလုံး ဂိုးပေါက်တည့်ကန်ချက် တစ်ကြိမ်မျှ မရှိသည်အထိလည်း အခြေအနေဆိုးရွားခဲ့သည်။
ယင်းအတွက်ကြောင့် အာတီတာက အာဆင်နယ်ကစားသမားများ၏ အောင်ပွဲအပေါ် ဆာလောင်စိတ်နှင့်နိုင်ပွဲတစ်ပွဲရယူရန် လိုအပ်သည့် မောင်းနှင်အားအပေါ် မေးခွန်းထုတ်ခဲ့ခြင်းလည်းဖြစ်သည်။
”ကျွန်တော်တို့က နိုင်ပွဲတစ်ပွဲအတွက်ဆိုရင် ဒီထက်ပိုတဲ့ ဆာလောင်စိတ်နဲ့ မောင်းနှင်အားတွေ လိုအပ်ပါတယ်။ ကျွန်တော်တို့ ဒီထက်အများကြီး ပိုလိုအပ်ပါတယ်။ ကျွန်တော့်အသင်း ကစားခဲ့တဲ့ ခြေစွမ်းနဲ့ စွမ်းဆောင်ရည်အတွက် ကျွန်တော်အရမ်းစိတ်ပျက်မိပါတယ်။ ပွဲတစ်ပွဲဟာ ခက်ခဲတဲ့အခြေအနေဖြစ်နေပြီဆိုရင် ဒါကိုသေချာပေါက် ကျော်ဖြတ်နိုင်ရမယ်ဆိုတဲ့ စိတ်ပိုင်းဆိုင်ရာ ဆုံးဖြတ်ချက်နဲ့ ခိုင်မာမှုမရှိခြင်းဟာ စိတ်ပျက်စရာပါ။ ဒီပွဲမှာ အဲဒီလိုအနေအထားမျိုး တကယ်ဖြစ်ခဲ့ပြီး ဘာကြောင့် ဒီလိုဖြစ်ရသလဲဆိုတာကို ကျွန်တော် သေသေချာချာ ပြန်သုံးသပ်သွားမှာပါ။ ဒီပြိုင်ပွဲရဲ့သမိုင်းမှာ ကျွန်တော်တို့အသင်းက အရမ်းအစဉ်အလာကြီးတဲ့ အသင်းဖြစ်ပြီး ဒီလိုပုံစံနဲ့ ထွက်သွားရတဲ့အတွက် အရမ်းနာကျင်မိပါတယ်”ဟု ပြောကြားခဲ့သည်။
