ချယ်လ်ဆီးအသင်းနည်းပြဟောင်း ဖရန့်လမ်းပတ်သည် လစ်လပ်နေသည့် နောဝစ်ချ် အသင်း နည်းပြရာထူးကို ငြင်းဆန်ခဲ့သဖြင့် ဗီလာအသင်းနည်းပြဟောင်း ဒင်းန်စမစ် ခန့်အပ်ခံရရန် ရေပန်းစားနေကြောင်း သိရသည်။
ယခုရာသီ ပရီးမီးယားလိဂ်ပြိုင်ပွဲတွင် ဇယားအောက်ဆုံးနေရာ ရောက်ရှိနေသည့် တန်းတက် နောဝစ်ချ်အသင်းသည် နည်းပြ ဖြစ်သူ ဒန်နီယဲလ်ဖာကယ်ကို နိုဝင်ဘာ ၆ ရက်တွင် ရာထူးမှ ထုတ်ပယ်ခဲ့သည်။ နောဝစ်ချ်အသင်းသည် ယခုရာသီအတွက် ပထမ ဆုံးနိုင်ပွဲ စတင်ရရှိပြီးနောက် နာရီပိုင်းအကြာမှာပင် ဖာကယ်ကို ထုတ်ပယ်ခဲ့ခြင်းဖြစ်သည်။
လစ်လပ်သွားသည့် ယင်းနေရာအတွက် လမ်းပတ်နှင့် ဒင်းန်စမစ်အပါအဝင် ရေပန်းစားသူများစာရင်း ထွက်ပေါ်နေပြီး ၎င်းတို့အနက် လမ်းပတ်ကို ခန့်အပ်ရန် နီးစပ်နေပြီဖြစ်ကြောင်း ဗြိတိန်သတင်းဌာနများစွာက ဖော်ပြခဲ့ကြသည်။ သို့သော် လမ်းပတ်အနေဖြင့် နောဝစ်ချ်အသင်းနှင့် ဆွေးနွေးမှုကို ရပ်ဆိုင်းလိုက်ပြီဖြစ်ကြောင်း သတင်းများ ထပ်မံထွက် ပေါ်လာခြင်းဖြစ်ပြီး ဒင်းန်စမစ်က ပြန်လည် ရေပန်းစားလာကြောင်း သိရသည်။
ဒင်းန်စမစ် (၅၀ နှစ်) မှာ ဖာကယ်ထုတ်ပယ်ခံရပြီး နောက်တစ်ရက်မှာပင် ဗီလာအသင်း နည်းပြရာထူးမှ ထုတ်ပယ်ခံခဲ့ရခြင်း ဖြစ်သည်။ ဒင်းန်စမစ်သည် လက်ရှိအချိန်တွင် အမေရိကသို့ အားလပ်ရက်ခရီးသွားရောက်နေပြီး ယင်းခရီးစဉ်မတိုင်မီကတည်းက နောဝစ်ချ်အသင်းနှင့် ဆွေးနွေးမှုပြုလုပ်ခဲ့ဖွယ်ရှိ ကြောင်း သိရသည်။
