နိုင်ငံတကာရက်သတ္တပတ်အတွင်း လီဗာပူးလ်ကစားသမားများ ခရီးနှင်ရမည့် မိုင်စုစုပေါင်း(၆)သောင်းနီးပါးရှိပြီး အကွာအဝေးအများဆုံးဖြစ်

ယခုနိုင်ငံတကာရက်သတ္တပတ်အတွင်း ပရီးမီးယားလိဂ်အသင်းများမှ ကစားသမားများ ခရီးနှင်ရမည့် အကွာအဝေးမိုင် စုစုပေါင်းတွင် လက်ရှိချန်ပီယံလီဗာပူးလ်အသင်းမှ ကစားသမားများ သွားလာရမည့် ခရီးမိုင်စုစုပေါင်းမှာ အများဆုံးဖြစ်ကြောင်း သိရသည်။

ဗြိတိန်သတင်းစာ Daily Mail က ပရီးမီးယားလိဂ်အသင်းများမှ နိုင်ငံတကာပွဲကစားရသည့် ကစားသမားများစာရင်းနှင့် သွားလာရမည့်ခရီးမိုင်အများဆုံးအသင်းများကို ဖော်ပြခဲ့သည်။

ယင်းကဲ့သို့ဖော်ပြရာတွင် ပရီးမီးယားလိဂ်အသင်းကြီး(၄)သင်းဖြစ်သည့် မန်ယူ၊ စပါး၊ ချယ်လ်ဆီး၊ မန်စီးတီးအသင်းတို့မှာ နိုင်ငံတကာပွဲများသို့ လက်ရွေးစင်ကစားသမား(၁၄)ဦးစီ စေလွှတ်ခဲ့ရပြီး ကစားသမားအများဆုံးစေလွှတ်ရသည့့် အသင်းများအဖြစ် မှတ်တမ်းဝင်ခဲ့သည်။

လီဗာပူးလ်အသင်းမှာမူ ကစားသမား (၁၂)ဦးသာ စေလွှတ်ရ၍ ယင်းအသင်းများထက် (၂)ဦးနည်းပါးသော်လည်း ခရီးဝေးသို့သွားလာရသည့် ကစားသမားများပြား၍ စုစုပေါင်း ခရီးနှင်ရမည့်အကွာအဝေးတွင် ထိပ်ဆုံး၌ဦးဆောင်နေခြင်းဖြစ်သည်။

ယင်းကစားသမား (၁၂)ဦးသွားလာရမည့် ခရီးမိုင်အကွာအဝေးစုစုပေါင်းမှာ မိုင်(၆)သောင်းနီးပါး(၅၉၉၇၂ မိုင်) အထိရှိကြောင်း သိရသည်။

ပရီးမီးယားလိဂ်အသင်းကြီး (၆)သင်းမှာ နိုင်ငံလက်ရွေးစင်ကစားသမားအများဆုံးရှိသည့်အလျောက် ခရီးမိုင်အကွာအဝေးအများဆုံးသွားလာရမည့် အသင်းများမှာလည်း ယင်းအသင်းများပင်ဖြစ်သည်။

ယခုနိုင်ငံတကာရက်သတ္တပတ်အတွင်း နိုင်ငံနှင့်ကလပ်အသင်းများအကြား ကစားသမားစေလွှတ်သည့် ပြဿနာများကြောင့် တောင်အမေရိကဇုန်ခြေစစ်ပွဲများကို ရွှေ့ဆိုင်းခဲ့ရာ ဘရာဇီးလ်၊ အာဂျင်တီးနား၊ ဥရုဂွေး၊ ကိုလံဘီယာအစရှိသော တောင်အမေရိဇုန်အသင်းများမှ လက်ရွေးစင်ကစားသမားများမှာ ယခုတစ်ပတ်တွင် ခရီးထွက်စရာမလိုတော့ဘဲ အင်္ဂလန်၌သာ ဆက်ရှိနေခဲ့သည်။

ယင်းကဲ့သို့ တောင်အမေရိက ကစားသမားများ ခရီးမနှင်သည့်တိုင် နိုင်ငံတကာပွဲများသို့ သွားရောက်ကစားသည့် ပရီးမီးယားလိဂ်ကစားသမားစုစုပေါင်းမှာ (၁၆၀)ဦး အထိရှိကြောင်း သိရှိရသည်။

အချို့သော ကစားသမားများမှာ ဗြိတိန်နိုင်ငံ၏ ကိုရိုနာဗိုင်းရပ်စ်ကန့်သတ်ချက်များကြောင့် အသင်းအချို့နှင့်ကစားမည့်ပွဲစဉ်များတွင် ပါဝင်ခွင့်မရဘဲ လွဲချော်မည်ဖြစ်ကြောင်း သိရသည်။

ဥပမာ – အာဆင်နယ်အသင်း၏ ဂါဘွန်တိုက်စစ်မှူး အူဘာမီယန်းမှာ DR ကွန်ဂိုအသင်းနှင့် အိမ်ကွင်းပွဲစဉ်ကို ကစားခွင့်ရမည်ဖြစ်သော်လည်း အန်ဂိုလာသို့ သွားရောက်ကစားရမည့် အဝေးကွင်းပွဲစဉ်တွင်မူ (အန်ဂိုလာမှာ ဗြိတိန်အစိုးရက Red List သတ်မှတ်ထား၍) ပါဝင်ကစားခွင့်ရရှိမည် မဟုတ်ပေ။

ဗြိိတိန်အစိုးရက ကိုရိုနာဗိုင်းရပ်စ်အန္တရာယ်ကြောင့် Red List သတ်မှတ်ထားသည့်နိုင်ငံ (၃၅)နိုင်ငံရှိနေကြောင်း သိရသည်။

ယင်းနိုင်ငံများသို့သွားရောက်ကစားမည့် ကစားသမားများမှာ ဗြိတိန်အစိုးရ၏သတ်မှတ်ချက်များအတိုင်း (၁၀)ရက်ကြာ သီးခြားနေထိုင်မှုပြုလုပ်ရမည်ဖြစ်၍ အချို့သောကလပ်အသင်းများက ၎င်းတို့၏ကစားသမားများကို ကန့်သတ်တားမြစ်မှုများ ပြုလုပ်ထားခြင်းဖြစ်သည်။

လက်ရှိအချိန်တွင် ရာသီကုန်ဆုံးရန်နီးကပ်လာပြီး ဥရောပဝင်ခွင့်နှင့် တန်းဆင်းဇုန်တိုက်ပွဲအတွက် အရေးကြီးသည့်အချိန်သို့ ရောက်ရှိနေရာ ကလပ်အသင်းများမှာ ၎င်းတို့၏ ကစားသမားများကို သီးခြားနေထိုင်မှုပြုလုပ်စေရန် ဆန္ဒမရှိကြောင်း သိရသည်။