LA Lakers အသင်းမှ နာမည်ကျော်ဘက်စကတ်ဘောသမား လီဘရွန်ဂျိမ်းစ်သည် အသင်း ၏ပွဲစဉ်တစ်ခု$ ခြေချင်းဝတ်ဒဏ်ရာ ရရှိခဲ့ပြီး ကာလကြာရှည်အနားယူရဖွယ်ရှိနေကြောင်း သိရသည်။
အတ္တလန်တာဟော့ခ်အသင်းက LA Lakers အသင်းအား (၉၉-၉၄)မှတ်ဖြင့် အနိုင်ရခဲ့သည့် ပွဲစဉ်ဒုတိယပိုင်းတွင် လီဘရွန်ဂျိမ်းစ်သည် ပြိုင်ဘက်ကစားသမား ဆော်လမွန်ဟေးလ်နှင့် ဝင်တိုက်မိရာမှလဲကျပြီး ဒဏ်ရာရရှိခဲ့ခြင်းဖြစ်သည်။
ESPN မှရေးသားသည့်သတင်းတွင် လီဘရွန်ဂျိမ်းစ်၏ဒဏ်ရာကို MRI Scan ဖတ်ရာတွင် ခြေချင်းဝတ်အဆစ် လွဲသွားခြင်းဖြစ်ပြီး ကာလကြာရှည်အနားယူရဖွယ်ရှိကြောင်း ဖော်ပြခဲ့သည်။ ယင်းသို့အဆစ်လွဲမှုသည် ပျောက်ကင်း သက်သာရန်အတွက် ရက်သတ္တပတ်အနည်း ငယ်မှ လနှင့်ချီကုသမှုခံယူရဖွယ်ရှိကြောင်း သိရသည်။
လီဘရွန်ဂျိမ်းစ်သည် ဒဏ်ရာအခြေအနေနှင့်ပတ်သက်ပြီး သတင်းထောက်များသို့ တရားဝင်ပြောကြားခြင်းမရှိသော်လည်း Twitter တွင် သူ့အနေဖြင့် အမြန်ဆုံးပြန်လာခဲ့မည်ဟု ရေးသားခဲ့သည်။ NBA ချန်ပီယံ LA Lakers အသင်းတွင် အဓိကကစားသမား အန်သိုနီဒေးဗစ်မှာလည်း ဒဏ်ရာကြောင့်ပင် ကာလရှည်ကြာ အနားယူနေရလျက်ရှိသည်။
