ဥရုဂွေးဘောလုံးအဖွဲ့ချုပ်သည် လက်ရှိနည်းပြ ဒီယေဂိုအလွန်ဆို၏နေရာတွင် လိဒ်စ်အသင်းနည်းပြဟောင်း ဘီယဲလ်ဆာကို အစားထိုးခန့်အပ်ရန် စီစဉ်နေကြောင်း သိရသည်။
ဥရုဂွေးဘောလုံးအဖွဲ့ချုပ်သည် ၂၀၂၁ ဒီဇင်ဘာလတွင် ကာလရှည်လက်တွဲခဲ့သော ဝါရင့်နည်းပြ အော်စကာတာဘာရက်ဇ်နှင့် လမ်းခွဲပြီးနောက် ဒီယေဂိုအလွန်ဆိုကို အစားထိုးခန့်အပ် ခဲ့ခြင်းဖြစ်ပြီး ယခုအခါ ကမ္ဘာ့ဖလားပြိုင် ပွဲတွင် အုပ်စုအဆင့်မှ ထွက်ခွာခဲ့ရသည့်အတွက် အပြောင်းအလဲပြုလုပ်ရန် စီစဉ်ခြင်းဖြစ်ကြောင်း သိရသည်။
ဥရုဂွေးအဖွဲ့ချုပ်က အခြားနည်းပြအချို့ကို ဘီယဲလ်ဆာနှင့်အပြိုင် လျာထားစာရင်းတွင် ထည့်သွင်းထားသော်လည်း ၎င်းတို့ အလိုအရှိဆုံးနည်းပြမှာ ဘီယဲလ်ဆာသာဖြစ်သည်ဟု နီးစပ်သူများက ပြောကြားခဲ့ကြောင်း သိရသည်။
ဘီယဲလ်ဆာသည် လိဒ်စ်အသင်းနှင့် လမ်းခွဲပြီးနောက် နည်းပြလောကသို့ ပြန်လည်ဝင်ရောက်ရန် ကြိုးပမ်းနေသော်လည်း လက်ရှိအချိန်အထိ အသင်းသစ် ရှာမတွေ့သေးပေ။
၎င်းအနေဖြင့် အာဂျင်တီးနားနှင့် ချီလီလက်ရွေးစင်အသင်းများကို ကိုင်တွယ်ခဲ့ဖူးသူ ဖြစ်သောကြောင့် ဥရုဂွေးဘောလုံးအဖွဲ့ချုပ်က လက်တွဲဆောင်ရွက်ရန် ဆန္ဒရှိနေခြင်းဖြစ်ကြောင်း သိရသည်။
