စပိန်နာမည်ကျော်အားကစားသတင်းစာ Marca မှ ရီးယဲလ်အသင်း ပရိသတ်များထံ စစ်တမ်းကောက်ယူခဲ့ရာ စစ်တမ်းဖြေဆိုသည့် ရီးယဲလ်အသင်းပရိသတ် (၅၃)ရာခိုင်နှုန်းက နည်းပြ ဇီဒန်းကို ရာထူးမှထုတ်ပယ်သင့်ပြီဖြစ်ကြောင်း ဆန္ဒမဲပေးခဲ့သည်။
ပြီးခဲ့သည့် စပိန်စူပါဖလားဆီမီးဖိုင်နယ်ပွဲစဉ်တွင် ဘီလ်ဘာအိုအသင်းကို ရှုံးနိမ့်ပြီးနောက် Marca မှ ရီးယဲလ်အသင်းပရိသတ်များထံ စစ်တမ်းကောက်ယူခဲ့ခြင်းဖြစ်ပြီး ရီးယဲလ် အသင်းပရိသတ်သောင်းကျော် ဆန္ဒမဲပေးခဲ့ကြကြောင်း သိရသည်။
Marca မှ ရီးယဲလ်အသင်းပရိသတ်များထံ မေးခွန်း (၃)ခုဖြင့် ဆန္ဒမဲကောက်ခံခဲ့ခြင်းဖြစ်သည်။
ပထမမေးခွန်းအဖြစ် ဘီလ်ဘာအိုအသင်းကို ရှုံး နိမ့်ရခြင်းအကြောင်းရင်းကို မေးမြန်းခဲ့ရာ ကစားသမားများ၏ စွမ်းဆောင်ရည်ညံ့ဖျင်းမှုကြောင့်ဟု ဖြေဆိုသူ (၃၀)ရာခိုင်နှုန်းဖြင့် အများဆုံးဖြစ်ခဲ့သည်။
ထို့နောက် နည်းပြ ဇီဒန်း၏ ဆုံးဖြတ်ချက်အမှားများကြောင့်ဟု ဖြေဆိုသူ (၂၈)ရာခိုင်နှုန်းရှိခဲ့ကြောင်း Marca မှ ဖော်ပြခဲ့သည်။
Marca ၏ ဒုတိယမေးခွန်းအဖြစ် ဘီလ်ဘာအိုအသင်းနှင့်ပွဲတွင် ရီးယဲလ်အသင်းမှ စိတ်ပျက်စရာအကောင်းဆုံးလူသားကို မေးမြန်းခဲ့ရာ နည်းပြ ဇီဒန်းဟု ဖြေဆိုသူ (၅၃)ရာခိုင်နှုန်းအထိရှိခဲ့ပြီး ခြေစွမ်းမပြနိုင်သည့် ကွင်းလယ်လူ ဟာဇက်က (၂၃)ရာခိုင်နှုန်းနှင့် အမှားများကျူးလွန်ခဲ့သည့် ဗက်ဇ်ကေးက (၁၈) ရာခိုင်နှုန်းရှိခဲ့သည်။
တတိယမေးခွန်းအဖြစ် နည်းပြ ဇီဒန်းကို ရာထူးမှထုတ်ပယ်သင့်ပြီလောဟုမေးမြန်းခဲ့ရာ စစ်တမ်းဖြေဆိုသူ ရီးယဲလ်အသင်းပရိသတ် (၇၅)ရာခိုင်နှုန်းက ရာထူးမှထုတ်ပယ်သင့်ပြီ ဖြစ်ကြောင်း ဖြေဆိုခဲ့သည်။
ရီးယဲလ်အသင်းပရိသတ်များက လက်ရှိရာသီတွင် နည်းပြ ဇီဒန်း၏ စွမ်းဆောင်ရည်များအပေါ် စိတ်ပျက်နေသော်လည်း ဇီဒန်းက ဘီလ်ဘာအိုအသင်းကို ရှုံးနိမ့်ခဲ့ခြင်းမှာ ကျရှုံးမှုတစ်ခုမဟုတ်ကြောင်း ကာကွယ်ပြောဆိုခဲ့သည်။
ဇီဒန်းက ”ဒါဟာ ကျရှုံးမှုမဟုတ်ပါဘူး။ ကျရှုံးမှုဆိုတာ ကွင်းထဲမှာ အရာအားလုံးမပေးဆပ်တာကို ခေါ်တာပါ။ ဘီလ်ဘာအိုနဲ့ပွဲမှာ ကျွန်တော်တို့အသင်း အရာအားလုံးပေးဆပ်ပြီး ကြိုးစားပေမဲ့ ချေပဂိုး ပြန်မရခဲ့ပါဘူး။ ဘဝက ဒီလိုပါပဲ။ အမြဲတမ်းအနိုင်မရပါဘူး”ဟု ပြောကြားခဲ့သည်။
ထို့ပြင် ဇီဒန်းက ဘီလ်ဘာအိုအသင်းနှင့် ရှုံးပွဲကို မေ့ဖျောက်ပြီး ရလဒ်ကောင်းများ ပိုင်ဆိုင်နိုင်ရန်အတွက် ကြိုးပမ်းသွားရမည်ဖြစ်ကြောင်း ရီးယဲလ်အသင်းသားများအား တိုက်တွန်းခဲ့သည်။
ရီးယဲလ်အသင်းသည် လာလီဂါချန်ပီယံဆုကို ကာကွယ်နိုင်ရန်အတွက် ရုန်းကန်နေရခြင်းကိုလည်း ရီးယဲလ်ပရိသတ်များက စိတ်ပျက်နေသည်။
