မန်ယူနှင့်ကစားမည့်ကာရာဘောင်ဖလားဗိုလ်လုပွဲတွင် နယူးကာဆယ်အသင်း၏ ပထမဦးစားပေး ဂိုးသမား နစ်ပုပ်မပါဝင်ခြင်းက အဆုံးအဖြတ်ပေးသွားနိုင်ကြောင်း နစ်ပုပ်မပါဘဲ မန်ယူကို အနိုင်ရရန် မလွယ်ကြောင်း ပေါလ်မာဆင်က သုံးသပ်ပြောဆိုလိုက်သည်။
နယူးကာဆယ်သည် ၅၄ နှစ်အတွင် ပထမဆုံးအကြိမ်ဆုဖလားဆွတ်ခူးနိုင်ရေးအတွက် အားခဲနေသလို မန်ယူသည်လည်း ၂၀၁၇ နောက်ပိုင်းပထမဆုံးအကြိမ်ဆုဖလားတစ်လုံးရရှိရေးအတွက် အရေးကြီးနေသဖြင့် လာမည့်တနင်္ဂနွေနေ့တွင် ကစားမည့် ကာရာဘောင်ဖလားဗိုလ်လုပွဲသည် နှစ်သင်းစလုံးအတွက် အရေးပါသည့်ပွဲဖြစ်နေသည်။
ပြီးခဲ့သည့်တစ်ပတ်က လီဗာပူးကို ရှုံးနိမ့်သည့်ပွဲတွင် ဂိုးဧရိယာအပြင်တွင် ဘောလုံးကို လက်ဖြင့် ဖမ်းခဲ့သည့်အတွက် အထုတ်ခံရသဖြင့်နစ်ပုပ်သည် မန်ယူနှင့်ပွဲကို ပါဝင်ခွင့်မရခြင်းဖြစ်သည်။ နစ်ပုပ်၏ အတွေ့အကြုံကို နယူးကာဆယ်က လိုအပ်မည်ဖြစ်ကြောင်း မာဆင်က မနက်ဖြန်ကစားမည့်ပွဲနှင့် ပတ်သက်၍ သုံးသပ်ပြောကြားလိုက်ခြင်းဖြစ်သည်။ နယူးကာဆယ်သည် ဂိုးသမားနေရာတွင် လီဗာပူးဂိုးသမားဟောင်း ကားရီးယပ်စ်ကို အသုံးပြုဖွယ်ရှိနေသည်။
မာဆင်က “ဟောင်ဝီအနေနဲ့ ဗိုလ်လုပွဲမှာ မဖြစ်မနေအသုံးပြုရမယ့် ကစားသမားက နစ်ပုပ်ဖြစ်ပါတယ်။ နယူးကာဆယ်က နစ်ပုပ်ကြောင့် ဒီနှစ်ဘောလုံးရာသီမှာ အမှတ်တွေအများကြီးရခဲ့ပါတယ်။ နယူးကာဆယ်အနေနဲ့ နစ်ပုပ်မပါဝင်ဘဲ မန်ယူကို အနိုင်ရမယ်ဆိုရင် ကျွန်တော်အံ့ဩမိမှာ ဖြစ်ပါတယ်။ သူက နယူးကာဆယ်အတွက် အဲဒီလောက်အရေးကြီးတဲ့ကစားသမားဖြစ်ပါတယ်။ အခုတော့ နစ်ပုပ်မပါနိုင်တဲ့အတွက် နယူးကာဆယ်တို့ ပေးဆပ်မှုကြီးမားသွားနိုင်ပါတယ်”ဟု ပြောဆိုလိုက်သည်။
ရက်ရှ်ဖို့အနေဖြင့် နယူးကာဆယ်ဘက်သို့ ဂိုးသွင်းနိုင်ဖွယ်ရှိကြောင်းလည်း မာဆင်က သုံးသပ်ပြောဆိုလိုက်သည်။ “ဗိုလ်လုပွဲမှာ မန်ယူက အထက်စီးကနေကစားမှာ ဖြစ်ပါတယ်။ နယူးကာဆယ်က ဂိုးတွေအများကြီးသွင်းလေ့ရှိတဲ့အသင်းမဟုတ်ပါဘူး”ဟုလည်း မာဆင်က ပြောဆိုလိုက်သည်။
မန်ယူအသင်းမန်နေဂျာ တန်းဟက်က နယူးကာဆယ်အသင်း၏ ပွဲကစားနေစဉ်အတွင် အချိန်ဖြုန်းတတ်သည့် အလေ့အထကို မန်ယူကစားသမားများက ဂရုမစိုက်ရန်လိုအပ်ကြောင်း အသင်းသားများကို သတိပေးပြောဆိုလိုက်သည်။
