မန်စီးတီးနည်းပြ ဂွါဒီယိုလာက ဒေါ့မွန်နှင့် ဂိုးမရှိသရေကျခဲ့သည့် ချန်ပီယံလိဂ်ပွဲစဉ်တွင် ပထမပိုင်းအပြီး၌ အသင်းတိုက်စစ်မှူး ဟော်လန်းအား လူစားလဲခြင်းမှာ ကစားသမား၏ ကျန်းမာရေးအခြေအနေကြောင့်ဖြစ်သည်ဟု ရှင်းလင်းပြောကြားခဲ့သည်။
မန်စီးတီးအသင်းအတွက် ယခုရာသီ ပြိုင်ပွဲစုံ (၁၅)ပွဲတွင် (၂၂)ဂိုးအထိ သွင်းယူထားသည့် ဟော်လန်းသည် အသင်းဟောင်း ဒေါ့မွန်နှင့်ပွဲတွင် ခြေစွမ်းပြနိုင်ရန် ရုန်းကန်ခဲ့ရပြီး ပထမပိုင်းအပြီးတွင်ပင် လူစားလဲခံခဲ့ရခြင်းဖြစ်သည်။
ဟော်လန်းအား လူစားလဲခဲ့ခြင်းနှင့်ပတ်သက်ပြီး မန်စီးတီးနည်းပြ ဂွါဒီယိုလာက ”အာလင်း(ဟော်လန်း)က သိပ်နေမကောင်းဘူး။ ဒေါ့မွန်နဲ့ပွဲမတိုင်ခင်က သူ အဖျားနည်းနည်းရှိခဲ့တယ်။ ကန်ဆယ်လိုက အဆင်ပြေပါတယ်။ သူက အသေးစားဒဏ်ရာရတာဖြစ်ပြီး အခု အဆင်ပြေနေပါပြီ။ ဟော်လန်းနဲ့ ကန်ဆယ်လိုတို့ဟာ မောပန်းနွမ်းနယ်နေပုံရပြီး အခုကာလမှာ ကျွန်တော်တို့အားလုံး ရုန်းကန်နေရပါတယ်”ဟု ပြောကြားခဲ့သည်။
ဂွါဒီယိုလာသည် ဒေါ့မွန်နှင့်ပွဲ၌ ပထမပိုင်းအပြီး ဟော်လန်းကို ဘာနာဒိုဆေးလ်ဗားနှင့် လူစားလဲခဲ့သလို၊ ကန်ဆယ်လိုကိုလည်း အကန်ဂျီနှင့် လူစားလဲခဲ့သည်။
ဘောလုံးဝေဖန်သူအဖြစ် ဆောင်ရွက်နေသည့် မန်ယူနောက်ခံလူ ဖာဒီနန်က ဂွါဒီယိုလာအနေဖြင့် ဟော်လန်းအား အနားပေးခဲ့ခြင်းမှာ ကောင်းမွန်သည့်လုပ်ရပ်ဖြစ်ကြောင်း ချီးကျူးခဲ့သည်။
