ဂျူဗင်တပ်စ်အသင်းသည် အသင်းတိုက်စစ်ကစားသမား ဒီဘားလားကို ၂၀၂၅ ခုနှစ်အထိ စာချုပ်သစ် ချုပ်ဆိုရန် စီစဉ်နေကြောင်း အီတလီသတင်းစာ Tuttosport က ဖော်ပြခဲ့သည်။
ဂျူဗင်တပ်စ်အသင်းနှင့် ချုပ်ဆိုထားသည့် ဒီဘားလား၏ လက်ရှိစာချုပ်မှာ ၂၀၂၂ ခုနှစ်တွင် ကုန်ဆုံးမည်ဖြစ်ပြီး ဒီဘားလားသည် အသင်းနှင့် စာချုပ်သစ်ချုပ်ဆိုရန် အသင့်ရှိနေကြောင်း သိရသည်။
Tuttosport ၏ ဖော်ပြချက်အရ ဂျူဗင်တပ်စ်အသင်းသည် အသက် (၂၆)နှစ်အရွယ်ရှိ အာဂျင်တီးနားတိုက်စစ်ကစားသမား ဒီဘားလားကို လာမည့်သြဂုတ်လတွင် စာချုပ်သစ်ချုပ်ဆိုမည်ဖြစ်ပြီး တစ်နှစ်လစာ ပေါင် (၉.၄)သန်းအထိ ပေးချေသွားမည်ဖြစ်ကြောင်း သိရသည်။
ဒီဘားလားသည် ပြီးခဲ့သည့် ၂၀၁၉ နွေရာသီအပြောင်းအရွှေ့ကာလတွင် ဂျူဗင်တပ်စ်အသင်းမှ ထွက်ခွာရန် နီးစပ်ခဲ့သူဖြစ်ပြီး ပရီးမီးယားလိဂ်ထိပ်သီးဖြစ်သည့် မန်ယူ၊ စပါးအသင်းများနှင့် အပြောင်းအရွှေ့သတင်းများ ထွက်ပေါ်ခဲ့သူဖြစ်သည်။
ဒီဘားလားသည် ဂျူဗင်တပ်စ်အသင်းမှ စီရော်နယ်လ်ဒို ထွက်ခွာသွားပါက အသင်း၏ပုံရိပ်ကစားသမားဖြစ်လာမည်ဖြစ်ပြီး ဂျူဗင်တပ်စ်အသင်းသည် အနာဂတ်တွင် ၎င်းကို အသင်းခေါင်းဆောင်အဖြစ်ပါ တာဝန်ပေးရန် စီစဉ်နေကြောင်း Tuttosport က ဖော်ပြခဲ့သည်။
