နာပိုလီ ကွင်းလယ်လူဟောင်း ဖြစ်တဲ့ ဘက်နီက ဥရောပ ထိပ်တန်းကလပ်တွေ ပစ်မှတ်ထားနေတဲ့ တိုက်စစ်မှုး ဗစ်တာအော်စီမန်ဟာ ဒီနွေရာသီမှာ ကလပ် ၂ ခုထဲက တစ်ခုကို ပြောင်းရွေ့ရန် ဆန္ဒရှိနေတယ်လို့ ဆိုလိုက်ပါတယ်။ အော်စီမန်ဟာ ပြီးခဲ့တဲ့ရာသီက စီးရီးအေမှာ ချန်ပီယံ ဖြစ်ခဲ့တဲ့ နာပိုလီ အသင်း အတွက် ၃၉ ပွဲကစား ၃၁ ဂိုး သွင်းယူကာ အထူး ခြေစွမ်းပြ ကစားခဲ့တာကြောင့် ထိပ်တန်းကလပ်တွေရဲ့ စိတ်၀င်စားမှုကို ခံထားရသူ ဖြစ်ပါတယ်။
မန်ယူနိုက်တက် အသင်းကလည်း နွေရာသီမှာ အထောင် တိုက်စစ်မှုး တစ်ဦး အားဖြည့်သွားရန် ရည်ရွယ်နေသလို လူကာကူ နဲ့ အူဘာမီယန်း တို့ကို ရောင်းချရန် စီစဉ်နေတဲ့ ချဲလ်ဆီးကလည်း အထောင် တိုက်စစ်မှုး တစ်ဦး ၀ယ်ယူရန် ပစ်မှတ်ထားနေပါတယ်။ ရီးရဲယ်မက်ဒရစ် ကလည်း ဘန်ဇီးမားရဲ့ နေရာမှာ ထိပ်တန်း တိုက်စစ်မှုး တစ်ဦးနဲ့ ပြန်လည် အားဖြည့်ရန် စီစဉ်နေပါတယ်။
နာပိုလီနဲ့ အတူ စကူဒက်တိုဖလား ၂ လုံး ရခဲ့တဲ့ အီတလီ ကွင်းလယ်လူဟောင်း ဘက်နီက “ဗစ်တာအော်စီမန်ဟာ ပြင်သစ်ကိုတော့ ပြန်သွားမှာ မဟုတ်ပါဘူး။ ဘာလို့လဲဆိုတော့ သူဟာ အဲဒီမှာ ကစားခဲ့ပြီး ဖြစ်လို့ပါ။ ဂျာမနီ ကိုလည်း တူတူပါပဲ။ သူဟာ လီဗာပူး နဲ့ ချဲလ်ဆီး ကိုလည်း သွားဖို့ အခြေအနေ မရှိပါဘူး။ ဘာလို့လဲဆိုတော့ ဒီအသင်းတွေဟာ ချန်ပီယံလိဂ် ၀င်ခွင့် မရထားလို့ ဖြစ်ပါတယ်။
သူ့ကို စိတ်၀င်စားနေတဲ့ အသင်းတွေထဲကမှ သူ ပြောင်းချင်တဲ့ အသင်း ၂ သင်း ကတော့ မန်ချက်စတာယူနိုက်တက် နဲ့ ရီးရဲယ်မက်ဒရစ် တို့ ဖြစ်မယ်လို့ ကျနော် ထင်ပါတယ်။ သူဟာ ဒီ ၂ သင်း ကလွဲပြီး အခြား အသင်းတွေကို စိတ်၀င်စားမှု မရှိပါဘူး။” လို့ ဆိုလိုက်ပါတယ်။
နာပိုလီ အသင်းကတော့ အော်စီမန် ကို အသင်းမှာ ဆက်ထိန်းထားရန် စီစဉ်ထားတယ်လို့ ဆိုထားပေမယ့်လည်း ကလပ် ဥက္ကဋ္ဌ ဖြစ်သူ ဒီလော်ရန်တစ် ကတော့ နိုင်ဂျီးရီးယား စတား အတွက် မငြင်းနိုင်လောက်တဲ့ ငွေကြေး ပမာဏနဲ့ ကမ်းလှမ်းလာခဲ့မယ် ဆိုရင်တော့ ကလပ်ရဲ့ အကျိုး အတွက် လက်ခံစဉ်းစား သွားမယ်လို့ ဆိုထားပါတယ်။
