အင်္ဂလန်အသင်းသည် ဒိန်းမတ်အသင်း နှင့် ဗုဒ္ဓဟူးနေ့ကစားမည့်ပွဲတွင် ဟာရီကိန်းကို ပွဲထွက်အသုံးပြုဖွယ်ရှိပြီး နေမကောင်းဖြစ်နေသည့် ချီဝဲလ်မှာမူ ထပ်မံလွဲချော်ဖွယ်ရှိကြောင်း နည်းပြ ဆောက်ဂိတ်က ပြောကြားသည်။
ဆောက်ဂိတ်သည် ဝေးလ်စ်နှင့်ခြေစမ်းပွဲတွင် ဟာရီကိန်းကို အနားပေးခဲ့သော်လည်း ဘယ်လ်ဂျီယံနှင့်ပွဲတွင်မူ ၆၆ မိနစ်၌ ကယ်လ်ဗတ်လူဝင်၏နေရာတွင် လူစားလဲ အသုံးပြုခဲ့သည်။
”ဟာရီနဲ့ ဂျော်ဒန် (ဟန်ဒါဆန်)တို့ရဲ့အခြေအနေကို စောင့်ကြည့်ရမှာပါ။ သေချာတာကတော့ ဟာရီက ဒီထက်ပိုပြီး ကစားရသင့်ပါတယ်။ ဂျော်ဒန်ရဲ့အခြေအနေကတော့ နည်းနည်းပိုရှုပ်ထွေးလို့ အရမ်းသတိထားရပါမယ်။ ချီဝဲလ်ကလည်း သီးသန့်လေ့ကျင့်မှုလုပ်နေပြီဆိုပြီး ဒီနေ့ ဟိုတယ်ကို သတင်းပို့လာပါတယ်။ သူက တစ်ပတ်လုံး မလေ့ကျင့်နိုင်ခဲ့လို့ ကြည့်ရပါဦးမယ်”ဟု ဆောက်ဂိတ်က ပြောကြားသည်။
ထို့ကြောင့် ယခုလနိုင်ငံတကာပွဲများတွင် ဟာရီကိန်းကို အသုံးမပြုရန် ပြောကြားထားသည့် စပါးနည်းပြ မော်ရင်ဟိုနှင့် အင်္ဂလန်နည်းပြ ဆောက်ဂိတ်အကြား မကျေလည်မှုများ ဖြစ်လာနိုင်သည်ဟု သတင်းများက ဖော်ပြခဲ့သည်။
မော်ရင်ဟိုက စပါးအသင်း၏ရာသီအစပွဲများဆက်တိုက်ကစားရမှုကြောင့် ဟာရီကိန်းကို ယခုလ နိုင်ငံတကာပွဲ(၃)ပွဲစလုံး အနားပေးရန် တောင်းဆိုခဲ့ခြင်းဖြစ်သည်။
အသက်(၂၇)နှစ်အရွယ်ရှိ ဟာရီကိန်းတွင် ပေါင်ဒဏ်ရာပြဿနာလည်းရှိနေကြောင်း သိရသည်။
