လီဗာပူးလ်တိုက်စစ်မှူးဟောင်း ဆွာရက်ဇ်က အသင်းတိုက်စစ်မှူး ဒါဝင်နူးနက်ဇ်အား အကြံပေးရန် အသင်းဟောင်းအနေဖြင့် မိမိထံအကူအညီ တောင်းခဲ့ကြောင်း ပြောကြားခဲ့သည်။
လီဗာပူးလ်အသင်းသည် ၂၀၂၂ နွေရာသီတွင် ဘင်ဖီကာအသင်းမှ ဥရုဂွေးတိုက်စစ်မှူး ဒါဝင်နူးနက်ဇ်ကို Add-ons ကြေးများအပါအဝင် ပေါင်သန်း (၈၀)ဖြင့် ဝယ်ယူခဲ့သည်။
သို့သော် ဒါဝင်နူးနက်ဇ်(၂၄ နှစ်)သည် အပိုင်အခွင့်အရေးများကို လွဲချော်ခြင်းကြောင့် ဝေဖန်မှုများနှင့် ရင်ဆိုင်ခဲ့ရပြီး ပြီးခဲ့သည့်ရာသီက ခက်ခဲသည့်ကာလများကို ကျော်ဖြတ်ခဲ့ရသည်။
ယင်းကာလတွင် လီဗာပူးလ်အသင်းက အသင်းတိုက်စစ်မှူးဟောင်း ဆွာရက်ဇ်အား နိုင်ငံအသင်းဖော် ဒါဝင်နူးနက်ဇ်ကို အကြံပေးရန် တိုက်တွန်းခဲ့ခြင်းဖြစ်သည်။
ဆွာရက်ဇ်က “ပြီးခဲ့တဲ့ရာသီက လီဗာပူးလ်အသင်းမှာ သူ ဒုက္ခရောက်နေတဲ့အချိန် သူနဲ့ ကျွန်တော် စကားပြောခဲ့ပါတယ်။ လီဗာပူးလ်အသင်းကလည်း သူနဲ့စကားပြောပေးဖို့၊ အကြံပေးဖို့ ကျွန်တော့်ဆီ အကူအညီတောင်းခဲ့ပါတယ်။ ကျွန်တော့်အနေနဲ့ ဒါဝင်နူးနက်ဇ်ကို အင်္ဂလိပ်ဘောလုံးလောကအကြောင်းနဲ့ သတိထားရမယ့်အရာတွေကို ပြောပြခဲ့ပါတယ်။ အခုအချိန်မှာ ဒါဝင်နူးနက်ဇ်ရဲ့ စွမ်းဆောင်မှုတွေကိုကြည့်ပြီး သူ့အတွက် ကျွန်တော် ပျော်ပါတယ်။ သူနဲ့ ကျွန်တော်က ကွဲပြားသလို၊ မျိုးဆက်လည်း ခြားနားပါတယ်”ဟု ပြောကြားခဲ့သည်။
