မန်ချက်စတာယူနိုက်တက်အသင်းသည် အငြင်းပွားဖွယ် အခြေအနေဖြစ်နေသည့် အသင်းတိုက်စစ်မှူး မေဆင်ဂရင်းဝုဒ်၏ အနာဂတ်ကို ဝုလ်ဗ်အသင်း နှင့် ကစားမည့် ပရီမီးယားလိဂ်ရာသီ အဖွင့်ပွဲစဉ်မတိုင်မီ ဆုံးဖြတ်သွားမည်ဖြစ်ကြောင်း သိရှိရသည်။
အသက် (၂၁)နှစ်အရွယ် ကြယ်ပွင့်တိုက်စစ်မှူး မေဆင်ဂရင်းဝုဒ်သည် လက်တွဲဖော်ဖြစ်သည့် အတူနေချစ်သူ အမျိုးသမီးအား စော်ကားရိုက်နှက်ခြင်း၊ မုဒိမ်းကျင့်ရန် ကြိုးပမ်းခြင်းဆိုသည့် စွဲချက်များနှင့် ရင်ဆိုင်ခဲ့ရသူ ဖြစ်သည်။
ဂရင်းဝုဒ်ကို အသင်းတွင် ဆက်ထားခြင်းမှာ အသင်း၏ ပုံရိပ်ကိုထိခိုက်စေသလို၊ အဝေးကွင်းပွဲစဉ်များတွင် ပြိုင်ဘက်ပရိသတ်များ၏ ပစ်မှတ်ထားတိုက်ခိုက်ခြင်းခံရနိုင်သည့် အခြေအနေကို မန်ချက်စတာယူနိုက်တက်အသင်းက စိုးရိမ်နေလျက်ရှိသည်။
အလားတူ လူ့အခွင့်အရေး စောင့်ကြည့်သူများကလည်း မန်ယူအသင်း၏ ဆုံးဖြတ်ချက်အပေါ် စောင့်မျှော်လျက်ရှိရာ ဂရင်းဝုဒ်ကိုသာ အသင်းတွင် ဆက်ထားမည်ဆိုပါက ရင်ဆိုင်ရမည့် အခက်အခဲအချို့ ရှိနေကြောင်းလည်းသိရသည်။
အခြားတစ်ဖက်တွင်မူ ဂရင်းဝုဒ်၏ ခြေစွမ်းအရည်အသွေးနှင့် အလားအလာမှာ မန်ချက်စတာယူနိုက်တက်အသင်း၏ တိုက်စစ်ပိုင်းကို အထောက်အကူပေးနိုင်မည်ဖြစ်ရာ မန်ယူအသင်းအနေဖြင့် ယတိပြတ်ဆုံးဖြတ်ရန် ခက်ခဲနေပြီးနောက် ရာသီသစ်မစတင် မီ ဆုံးဖြတ်ချက်ချရန် စီစဉ်ခဲ့ခြင်းဖြစ်ကြောင်း သိရသည်။
