တမြန်နှစ်ရာသီ ပရီးမီးယားလိဂ်၏ အခွန်မဆောင်ရသေးမီ အရှုံးငွေ ပေါင်(၁)ဘီလီယံအထိ ရှိခဲ့ပြီး ပြိုင်ပွဲသမိုင်းတစ်လျှောက်အဆိုးဆုံးဖြစ်

တမြန်နှစ်ဘောလုံးရာသီဖြစ်သော ၂၀၁၉-၂၀ ဘောလုံးရာသီ ပရီးမီးယားလိဂ်အသင်းများ၏ ဘဏ္ဍာရေးအခြေအနေကို စီးပွားရေးကုမ္ပဏီတစ်ခုဖြစ်သော Deloitte က ထုတ်ပြန်ခဲ့ရာ ပရီးမီးယားလိဂ်အသင်းများအနေဖြင့် ပြိုင်ပွဲသမိုင်းတစ်လျှောက် အဆိုးဆုံးအဖြစ် စံချိန်တင်ရှုံးနိမ့်ခဲ့ကြောင်း သိရှိရသည်။

Deloitte ၏ဖော်ပြချက်အရ ယင်းရာသီတွင် ပရီးမီးယားလိဂ်အသင်းများ၏ အခွန်မဆောင်ရသေးမီ စုစုပေါင်းအရှုံးငွေမှာ ပေါင်(၁)ဘီလီယံအထိ ရှိခဲ့ကြောင်း သိရသည်။

ကိုရိုနာဗိုင်းရပ်စ်ခြိမ်းခြောက်မှုများကြောင့် ပွဲများကို ရပ်နားခဲ့ရသလို၊ ပြန်ကစားချိန်တွင် ပရိသတ်များကို ဝင်ခွင့်မပြုဘဲ ကွင်းပိတ်ကစားခဲ့ရခြင်းကြောင့် ကလပ်အသင်းများမှာ ကွင်းဝင်ကြေးဝင်ငွေများစွာ ကျဆင်းခဲ့သည်။

ထို့အတူ ဘောလုံးရာသီကို အချိန်မှန်အဆုံးသတ်နိုင်ခြင်းမရှိဘဲ နှောင့်နှေးမှုများဖြစ်ပေါ်ခဲ့၍ ရုပ်သံကုမ္ပဏီများကို (ကြိုတင်သဘောတူညီချက်များအရ) ငွေကြေးအချို့တစ်ဝက်ပြန်လည်ပေးဆောင်ခဲ့ရရာ ရုပ်သံဝင်ငွေမှာလည်း များစွာကျဆင်းခဲ့ကြောင်း သိရသည်။

Deloitte ၏ဖော်ပြချက်အရ ပရီးမီးယားလိဂ်အသင်းများလျော့နည်းခဲ့သည့် ရုပ်သံဝင်ငွေမှာ ယခင်ရာသီများနှင့် နှိုင်းယှဉ်လျှင် (၁၃%) အထိရှိခဲ့ကြောင်း သိရသည်။

ပေါင်(၁)ဘီလီယံခန့် အရှုံးပြမှုမှာ ပရီးမီးယားလိဂ်ပြိုင်ပွဲ သမိုင်းတစ်လျှောက် တစ်ကြိမ်တစ်ခါမှ မရှိဖူးသော ပမာဏဖြစ်ခဲ့ပြီး ယင်းရာသီမတိုင်မီ ၂၀၁၈-၁၉ ရာသီက အရှုံူးပြမှုနှင့် နှိုင်းယှဉ်ပါက (၅)ဆခန့် ပိုမိုရှုံးနိမ့်ခြင်းဖြစ်ကြောင်း သိရသည်။

၂၀၁၈-၁၉ ရာသီ ပရီးမီးယားလိဂ်အသင်း(၂၀)၏ အခွန်မဆောင်ရသေးမီ အရှုံး/အမြတ်ကို တွက်ချက်ပါက အရှုံးငွေမှာ ပိုများခဲ့ပြီး ပေါင်သန်း(၂၀၀)ခန့် ရှိခဲ့ကြောင်း သိရသည်။

Deloitte ၏ အားကစားစီးပွားရေးဆိုင်ရာအဖွဲ့မှတာဝန်ရှိသူဒန်ဂျူံးစ်က ”ကမ္ဘာတစ်ဝန်းပျံနှံ့ခဲ့တဲ့ ကိုရိုနာဗိုင်းရပ်စ်ကပ်ရောဂါ(Pandemic) ကြောင့် လူမှုဘဝတွေ ထိခိုက်ခဲ့ရသလို၊ ကမ္ဘာ့စီးပွားရေးကိုလည်း ဆိုးဆိုးရွားရွားထိခိုက်စေခဲ့ပါတယ်။ ဒါကြောင့် ၂၀၁၉-၂၀ ရာသီအတွင်း ပရီးမီးယားလိဂ်အသင်းတွေရဲ့ ဝင်ငွေကလည်း အတော်ကို ကျဆင်းခဲ့ပါတယ်။ အ့ံအားသင့်စရာတော့ မဟုတ်ပါဘူး”ဟု ပြောကြားခဲ့သည်။

ထို့ပြင် ဒန်ဂျူံးစ်က ၂၀၂၀-၂၁ ဘောလုံးရာသီ ဘဏ္ဍာရေးစစ်တမ်းထွက်ပေါ်လာခဲ့ပါက ဆိုးရွားသည့်အရှုံူးပြမှု ကိန်းဂဏန်းများကို ဆက်လက်တွေ့မြင်ရဖွယ်ရှိကြောင်းလည်း မှတ်ချက်ပြု သုံးသပ်ခဲ့သည်။

ပြီးခဲ့သည့် ၂၀၂၀-၂၁ ရာသီက ရာသီအဆုံးသတ်ချိန်မှသာ ပရိသတ်များမှာ (အကန့်အသတ်အားဖြင့်)ကွင်းအတွင်းသို့ ဝင်ရောက်ကြည့်ရှုခွင့်ရရှိခဲ့ကြသည်။

လာမည့် ၂၀၂၁-၂၂ ရာသီတွင် ပရိသတ်များ ကွင်းအတွင်းပြန်လည်ကြည့်ရှုခွင့် ရရှိမည်ဖြစ်ရာ ကလပ်အသင်းများအနေဖြင့် ဝင်ငွေပြန်လည်များပြားလာပြီး ဘဏ္ဍာရေးအကျပ်အတည်းမှ လွတ်မြောက်ဖွယ်ရှိကြောင်း ဒန်ဂျူံးစ်က သုံးသပ်ခဲ့သည်။