တန်ဟက်ဂ်လက်ထက်တွင် လီဗာပူးလ်အသင်း၏ အခါးသီးဆုံးမဟာပြိုင်ဘက် မန်ယူအသင်း တိုးတက်လာသည့်အပေါ် စိုးရိမ်မိကြောင်း လီဗာပူးလ်ဂန္ထဝင် ကာရေဂါ ဝန်ခံ

ဘောလုံးဝေဖန်သူအဖြစ် ဆောင်ရွက်နေသည့် လီဗာပူးလ်ဂန္ထဝင်နောက်ခံလူဟောင်း ကာရေဂါက နည်းပြ တန်ဟက်ဂ်လက်ထက်တွင် လီဗာပူးလ်အသင်း၏ အခါးသီးဆုံးမဟာပြိုင်ဘက် မန်ယူအသင်း တိုးတက်လာသည့်အပေါ် စိုးရိမ်မိကြောင်း ဝန်ခံပြောကြားခဲ့သည်။

မန်ယူအသင်းသည် ၂၀၁၃ ခုနှစ်တွင် ဂန္ထဝင်နည်းပြကြီး ဖာဂူဆန်ထွက်ခွာသွားပြီးနောက် ပရီးမီးယားလိဂ်ချန်ပီယံဆုကို ရယူနိုင်ခြင်းမရှိတော့ဘဲ ရုန်းကန်ခဲ့ရသည်။ ဖာဂူဆန် ထွက်ခွာသွားပြီးနောက် မန်ယူအသင်းကို ကိုင်တွယ်ခဲ့သည့် နည်းပြ ရှစ်ဦး (ယာယီ နည်းပြများအပါအဝင်) ရှိခဲ့ပြီး ယင်းထဲတွင် မော်ရင်ဟို၊ ဗန်ဟားလ်တို့ကဲ့သို့ ထိပ်တန်းနည်းပြများ ပါဝင်ခဲ့သည်။ မန်ယူအသင်းသည် မော်ရင်ဟိုလက်ထက်တွင် ယူရိုပါလိဂ်နှင့် လိဂ်ဖလားတို့ကို ရယူနိုင်ခဲ့ပြီး ဗန်ဟားလ် လက်ထက်တွင် FA ဖလား ရရှိခဲ့သည်။ သို့သော် မန်ယူအသင်းအနေဖြင့် ဖာဂူဆန်ထွက်ခွာသွားပြီးနောက် ပရီးမီးယားလိဂ်ချန်ပီယံဆုကို စိန်ခေါ်နိုင်ရန် ရုန်းကန်ခဲ့ရပြီး ချန်ပီယံလိဂ်ဝင်ခွင့်ရရန် ရုန်းကန်ခဲ့ရသည့် ရာသီများပင်ရှိခဲ့သည်။ 

သို့သော် မန်ယူအသင်းသည် ပြီးခဲ့သည့်နွေရာသီက အသင်းကို စတင်ကိုင်တွယ်ခဲ့သည့် နည်းပြ တန်ဟက်ဂ်လက်ထက်တွင် တိုးတက်လာပြီး ယခုရာသီပရီးမီးယားလိဂ်  ၂၂ ပွဲကစားချိန်၌ ရမှတ် ၄၃ မှတ် ရရှိထားကာ အဆင့် ၃ နေရာတွင် ရပ်တည်နေသည်။ မန်ယူအသင်းအနေဖြင့် အမှတ်ပေးဇယားထိပ်ဆုံးမှ (နှစ်ပွဲလျော့ကစားထားသည့်) အာဆင်နယ်အသင်း (၅ဝမှတ်)နှင့် ၈မှတ်သာကွာဟသည်။ 

မန်ယူအသင်း ယင်းသို့တိုးတက်လာချိန်တွင် လီဗာပူးလ်အသင်းမှာ ရုန်းကန်နေရပြီး ယခုရာသီ ပရီးမီးယားလိဂ်ပွဲ ၂၀ ကစားပြီးချိန်တွင် ရမှတ် ၂၉ မှတ်ဖြင့် အဆင့် ၁၀ နေရာသို့ ရောက်ရှိနေကာ အဆင့် ၄ နေရာမှ နယူးကာဆယ်(၄၀ မှတ်)နှင့် ၁၂ မှတ် အထိ ကွာဟလျက်ရှိသည်။ ထို့ကြောင့် လီဗာပူးလ်နောက်ခံလူဟောင်း ကာရေဂါက တန်ဟက်ဂ်လက်ထက်တွင် မန်ယူအသင်း၏ တိုးတက်မှုအပေါ် စိုးရိမ်မိကြောင်း ပြောကြားခဲ့ခြင်းဖြစ်သည်။ 

ကာရေဂါက “တန်ဟက်ဂ်လက်ထက်မှာ မန်ယူအသင်းက အရင်ကနဲ့ မတူတော့ဘူးလို့ ခံစားရပါတယ်။ အရင်နည်းပြတွေတုန်းက မန်ယူအသင်းမှာ ပြဿနာတွေရှိနေတယ်လို့ ခံစားရပေမဲ့ တန်ဟက်ဂ်လက်ထက်မှာတော့ မန်ယူအသင်း အရာအားလုံးကောင်းမွန်လာတယ်လို့ ခံစားရပါတယ်။ ဖာဂူဆန်ထွက်ခွာသွားပြီးနောက် မန်ယူအသင်းမှာ မမြင်ရတဲ့စိတ်ဓာတ်ပိုင်းကို အခု တန်ဟက်ဂ်အသင်းမှာ မြင်နေရပါပြီ။ မန်ယူအသင်း ပြန်လာတော့မယ်လို့ ခံစားရပါတယ်။ တန်ဟက်ဂ်လက်ထက်မှာ အရင်နည်းပြတွေနဲ့မတူတဲ့ အရိပ်အယောင်တွေ ဖြစ်နိုင်ခြေတွေကို မြင်တွေ့နေရပါတယ်။ အဲဒီအတွက် ကျွန်တော့်အနေနဲ့ စိုးရိမ်မိပါတယ်”ဟု Sky Bet အစီအစဉ်တွင် ပြောကြားခဲ့သည်။