ဘာစီလိုနာအသင်းဥက္ကဋ္ဌဖြစ်သူ ဘာတိုမူက ကာတာကလပ် အယ်လ်ဆတ်ဒ်အသင်းနည်းပြ ဇာဗီနှင့် မိမိအကြား ကောင်းမွန်လွန်းသည့် ဆက်ဆံရေးရှိသော်လည်း ဘာစီလိုနာနည်းပြနေရာတွင်မူ ဆယ်တီယန်သာ ဆက်ရှိနေမည်ဖြစ်ကြောင်းပြောကြားခဲ့သည်။
ဘာစီလိုနာအသင်းနှင့် စပိန်လက်ရွေးစင်ဂန္ထဝင်ကွင်းလယ်လူဟောင်းတစ်ဦးဖြစ်သူ ဇာဗီ (၄၀ နှစ်)သည် လက်ရှိတွင် ဘာစီလိုနာအသင်းနည်းပြသစ်ဖြစ်လာရန် ရေပန်းစားနေသူဖြစ်ပြီး ဇာဗီကိုယ်တိုင်ကလည်း တစ်နေ့နေ့တွင် ဘာစီလိုနာအသင်းကိုကိုင် တွယ်လိုကြောင်း ဝန်ခံထားသူဖြစ်သည်။
ထို့ပြင် လက်ရှိဘာစီလိုနာအသင်းနည်းပြ ဆယ်တီယန်မှာလည်း ကစားသမားများနှင့် အဆင်မပြေမှုများရှိနေသည်ဟု စပိန်မီဒီယာများက ဖော်ပြခဲ့ကြသလို၊ လာမည့်ချန်ပီယံလိဂ်ပြိုင်ပွဲရလဒ်မှာ ၎င်းင်း၏အနာဂတ်ကို အဆုံး အဖြတ်ပေးလိမ့်မည်ဟုလည်း ရေးသားခဲ့ကြသည်။
ယင်းအခြေအနေများနှင့်ပတ်သက်ပြီး ဘာတိုမူက ”ဇာဗီကစားသမားဘဝကတည်းက ကျွန်တော်နဲ့ သူ့ကြားမှာ ထူးခြားတဲ့ ဆက်ဆံရေးတွေရှိပြီးသားပါ။ ဒါပေမဲ့ ဆယ်တီယန်ဟာ လက်ရှိမှာ ဘာစီလိုနာအသင်းနည်းပြဖြစ်သလို၊ နောက်ရာသီလည်း အသင်းမှာ ဆက်ရှိနေဦးမှာပါ။ ဆယ်တီယန်အနေနဲ့ လာမယ့်ချန်ပီယံလိဂ်ပြိုင်ပွဲမှာ အသင်းကို အကောင်းဆုံးဦးဆောင်နိုင်မယ် လို့လည်းယုံကြည်ပါတယ်”ဟု Mundo Deportivo သို့ပြောကြားခဲ့သည်။
ဇာဗီသည် လက်ရှိတွင် အယ်လ် ဆတ်ဒ်အသင်းနှင့် တစ်နှစ်သက်တမ်း တိုးစာချုပ်ချုပ်ဆိုထားသော်လည်း ဘာစီလိုနာအသင်းခေါ်ယူလိုပါက ထွက်ခွာခွင့်ပြုမည့်အချက်ပါဝင် ကြောင်းသိရသည်။
