ချယ်လ်ဆီး၊ လီဗာပူးလ်နှင့် အင်္ဂလန်လက်ရွေးစင် ကွင်းလယ်ကစားသမားဟောင်း ဂျိုးကိုးလ်က နယူးကာဆယ်အသင်းသည် လာမည့် ဇန်နဝါရီအပြောင်းအရွှေ့တွင် ပေါင်သန်း(၂၀၀)မှ (၃၀၀)ကြားသုံးစွဲလိမ့်မည်ဟု သုံးသပ်ပြောကြားခဲ့သည်။
နယူးကာဆယ်အသင်းသည် နည်းပြအပြောင်း အလဲပြုလုပ်ထားသော်လည်း လက်ရှိအချိန်အထိ နိုင်ပွဲရယူနိုင်ခြင်းမရှိသေးဘဲ ပရီးမီးယားလိဂ်အမှတ် ပေးဇယားအောက်ဆုံးနေရာတွင် ရပ်တည်နေသည်။
ထို့ကြောင့် တန်းဆင်းအန္တရာယ်အတွက် စိုးရိမ်ရသည့် အခြေအနေရောက်ရှိနေပြီဖြစ်ရာ ငွေကြေးများစွာ သုံးစွဲ၍ အားဖြည့်ပြင်ဆင်လိမ့်မည်ဟု ဂျိုးကိုးလ်က သုံးသပ်ခဲ့ခြင်းဖြစ်သည်။
ဂျိုးကိုးလ်က “သူတို့ ဇန်နဝါရီ အပြောင်းအရွှေ့မှာ ပေါင်သန်း(၂၀၀)ကနေ (၃၀၀)အထိ သုံးစွဲပြီး ပြင်ဆင်ပါလိမ့်မယ်။ သူတို့မှာ အချမ်းသာဆုံးအသင်းပိုင်ရှင်တွေရှိနေတာကြောင့် ဇန်နဝါရီမှာ သူတို့ရဲ့ ငွေကြေးတွေကို ထုတ်သုံးလိမ့်မယ်လို့ ထင်ပါတယ်။ ကစားသမားသစ် (၄)ယောက် ဒါမှမဟုတ် (၅)ယောက် ရောက်ရှိလာလိမ့်မယ်လို့ ကျွန်တော် ထင်ပါတယ်”ဟု ပြောကြားခဲ့သည်။
နယူးကာဆယ်အသင်းကို ဆော်ဒီအိမ်ရှေ့မင်းသား ဦးဆောင်သည့် လုပ်ငန်းရှင်များက ဝယ်ယူထားခြင်းဖြစ်ပြီး အနာဂတ်၌ ထိပ်တန်းအသင်းဖြစ်လာရန် ရည်မှန်းထားသော်လည်း လက်ရှိအခြေအနေတွင်မူ နည်းပြသစ်အပြောင်းအလဲပြုလုပ်ခဲ့သည့်တိုင် တန်းဆင်းအန္တရာယ်နှင့် ရင်ဆိုင်နေရသည်။
ထို့ကြောင့် ဇန်နဝါရီတွင် ပြင်ဆင်မှုများစွာ ပြုလုပ်လိမ့်မည်ဟု ဂျိုးကိုးလ်နည်းတူ အများစုက ထင်မြင်ချက်ပေးထားကြသည်။
