မက်ဆီသည် နွေရာသီအားလပ်ရက်ကာလဖြစ်သော်လည်း နည်းပြသစ် ကိုးမင်းနှင့်တွေ့ ဆုံရန် ကြာသပတေးနေ့တွင် ဘာစီလိုနာသို့ ပြန်လာခြင်းဖြစ်ပြီး ယင်း တွေ့ဆုံမှုအကြောင်း အသေးစိတ် အချက်အလက်များ ပေါက်ကြားခဲ့သောကြောင့် ဒေါသပေါက်ကွဲနေကြောင်း Marca သတင်းစာက စနေနေ့တွင် ဖော်ပြခဲ့သည်။
ဘာစီလိုနာအသင်းနည်းပြသစ် ရော်နယ်လ်ကိုးမင်းသည် လူးဝစ်ဆွာရက်ဇ်၊ ဘူးစကွက်စ်၊ အယ်လ်ဘာတို့ကိုရောင်းချမည့် အသင်း၏အစီအစဉ်အား သဘောတူသော်လည်း ပီကေးကိုမူ ဆက်ထိန်းထားရန် ဆန္ဒရှိနေကြောင်း AS သတင်းစာက ဖော်ပြခဲ့သည်။
![](https://sportsmyan.com/wp-content/uploads/2020/08/Ronald-Koeman-1024x536.jpg)
နယ်သာလန်လက်ရွေးစင် အသင်းနည်းပြ ရော်နယ်လ်ကိုးမင်း သည် ရာထူးမှထုတ်ပယ်ခံရသည့် ဆယ်တီယန်၏နေရာတွင် အစားထိုး ခန့်အပ်ခံရခြင်းဖြစ်ပြီး ပြီးခဲ့သည့် ဗုဒ္ဓဟူးနေ့က နှစ်နှစ်စာချုပ် ချုပ်ဆိုခဲ့သည်။ ရော်နယ်လ်ကိုးမင်းအနေဖြင့် ဘာစီလိုနာအသင်း၏ မြင့်မားသည့် လစာပေးချေမှုပြဿနာကို အရေးတကြီးဖြေရှင်းရန် လိုအပ်နေသလို အဓိက ကစားသမားအများစု၏အသက်မှာ ၃၀ အထက်ဖြစ်နေသောကြောင့် ပျမ်းမျှအသက်ကိုလည်း လျှော့ချရမည်ဖြစ်သည်။
![](https://sportsmyan.com/wp-content/uploads/2020/08/sergio-busquets-bacelona-1024x536.jpg)
သို့ဖြစ်ရာ ယင်းပြဿနာနှစ်ခုကို ဖြေရှင်းနိုင်ရန်အတွက် ၀ါရင့်ကစားသမားလေးဦး ရောင်းချရန် စီစဉ်ထားပြီး ၎င်းတို့မှာ တိုက်စစ်မှူး လူးဝစ်ဆွာရက်ဇ် (၃၃ နှစ်၊ တစ်ပတ်လစာ ပေါင် ၂၆၀၀၀၀၊ တစ်နှစ်လစာ ပေါင် ၁၃ ဒသမ ၄ သန်း)၊ ကွင်းလယ်လူ ဘူးစကွက်စ် (၃၂ နှစ်၊ တစ်ပတ်လစာ ပေါင် ၁၇၀၀၀၀၊ တစ်နှစ်လစာ ပေါင် ကိုးသန်း)၊ ဘယ်နောက်ခံလူ ယော်ဒီအယ်လ်ဘာ (၃၁ နှစ်၊ တစ်ပတ်လစာ ပေါင် ၁၇၀၀၀၀၊ တစ်နှစ်လစာ ပေါင် ကိုးသန်း)၊ နောက်ခံလူ ပီကေး (၃၃ နှစ်၊ တစ်ပတ်လစာ ပေါင် ၁၇၀၀၀၀၊ ပေါင်ကိုးသန်း) တို့ဖြစ်ကြောင်း Cadena Ser ရေဒီယို၏ El Larguero အစီအစဉ်တွင် ထုတ်လွှင့်ခဲ့သည်။
![](https://sportsmyan.com/wp-content/uploads/2020/08/barcelona-vs-bayern-munich-3-1024x536.jpg)
သို့သော် AS သတင်းစာက ကိုးမင်းသည် ဆွာရက်ဇ်၊ ဘူး စကွက်စ်၊ အယ်လ်ဘာတို့ကိုရောင်းချရန် သဘောတူသော်လည်း ပီကေးကိုမူ ဆက်ထိန်းထားရန် ဆန္ဒရှိနေကြောင်း ဖော်ပြခဲ့ခြင်းဖြစ်သည်။ ပီကေးသည် ပြီးခဲ့သည့်တစ်ပတ်က ဘိုင်ယန်မြူးနစ်အသင်းအား စံချိန်တင်ရလဒ်ဖြင့် အရှက်တကွဲရှုံးနိမ့်ပြီးနောက် သွေးသစ်လောင်းရန် လိုအပ်နေကြောင်းနှင့် လိုအပ်ပါက မိမိအရင်ဆုံး ထွက်ပေးမည်ဖြစ်ကြောင်း ပြောကြားထားသည်။ ထို့ပြင် ကိုးမင်းသည် အနာဂတ်မရေ မရာဖြစ်နေသည့် အသင်းခေါင်းဆောင် မက်ဆီကို ဖျောင်းဖျနိုင်ရန် လိုအပ်နေပြီး မက်ဆီကိုယ်တိုင်ကမူ အသင်း၌ဆက်နေရန်ထက် ထွက်ခွာရန် ဆန္ဒရှိနေသည်ဟု ပြောကြားထားကြောင်း ကတ်တလန်အခြေစိုက် RAC 1 ရေဒီယိုက ကြာသပတေး နေ့တွင် ထုတ်လွှင့်ကြေညာခဲ့သည်။
မက်ဆီသည် ဥက္ကဋ္ဌ ဘာတိုမူနှင့် ဘုတ်အဖွဲ့ကို ယုံကြည်မှုမရှိသောကြောင့် လမ်းခွဲရန် စဉ်းစားနေခြင်း ဖြစ်ပြီး ၎င်း၏စာချုပ်မှာ ၂၀၂၁ ခုနှစ် တွင် ကုန်ဆုံးမည်ဖြစ်ရာ တစ်နှစ်သာ ကျန်ရှိတော့သည်။ မက်ဆီသည် နွေရာသီအားလပ်ရက်ကာလဖြစ်သော်လည်း နည်းပြသစ် ကိုးမင်းနှင့်တွေ့ ဆုံရန် ကြာသပတေးနေ့တွင် ဘာစီလိုနာသို့ ပြန်လာခြင်းဖြစ်ပြီး ယင်း တွေ့ဆုံမှုအကြောင်း အသေးစိတ် အချက်အလက်များ ပေါက်ကြားခဲ့သောကြောင့် ဒေါသပေါက်ကွဲနေကြောင်း Marca သတင်းစာက စနေနေ့တွင် ဖော်ပြခဲ့သည်။
![](https://sportsmyan.com/wp-content/uploads/2020/07/Barcelona-messi-1024x536.jpg)
ကိုးမင်းကမူ မက်ဆီ၏အနာဂတ်နှင့်ပတ်သက်၍ “သူက အခုအချိန်အထိ ဘာစီလိုနာအသင်းနဲ့ စာချုပ်ရှိနေပြီး ဘာစီလိုနာကစားသမားလည်း ဖြစ်ပါတယ်။ အရေးကြီးတာက သူနဲ့ကျွန်တော် ဆွေးနွေးမှုတွေပြုလုပ်ဖို့ လိုအပ်နေပါတယ်။ မက်ဆီကို အသင်းမှာ ဆက်ရှိနေစေဖို့ မျှော်လင့်ပါတယ်။ ဒါပေမဲ့ သူ တကယ်အသင်းမှာဆက်နေအောင် တိုက်တွန်းနိုင်ပါ့မလားဆိုတာကတော့ မသေချာပါဘူး။ သူနဲ့အတူ အလုပ်လုပ်ခွင့်ရဖို့ မျှော်လင့်ပါတယ်” ဟု ပြောကြားထားသည်။