အက်သလက်တီကိုအသင်း၏ ဥက္ကဋ္ဌဖြစ်သူ စီရီဇိုက ဆွာရက်ဇ်ကြောင့် မိမိတို့အသင်း ပိုကောင်းလာသည်ဟု ချီးကျူးပြောကြားခဲ့သည်။
အသက် (၃၃)နှစ်အရွယ်ရှိ ဥရုဂွေးဝါရင့်တိုက်စစ်မှူး ဆွာရက်ဇ်သည် ပြီးခဲ့သည့်နွေရာသီအပြောင်းအရွှေ့ကာလတွင် ဘာစီလိုနာအသင်းမှ အက်သလက်တီကိုအသင်းထံသို့ ပြောင်းရွှေ့လာခဲ့ပြီး အသင်းတွင် ခြေစွမ်းပြနေသူဖြစ်သည်။
စီရီဇိုက “ဆွာရက်ဇ်ဟာ ထိပ်တန်းကစားသမားဆိုတာကို လူတိုင်း သိပါတယ်။ သူဟာ ဘောလုံးသမိုင်းမှာ ဂိုးသွင်းအကောင်းဆုံး တိုက်စစ်မှူးတွေထဲမှာ တစ်ဦးအပါအဝင်ဖြစ်ပါတယ်။ သူ့ရဲ့အတွေ့အကြုံတွေက အသင်းအတွက် များစွာအထောက်အပံ့ ဖြစ်ပါတယ်။ ဆွာရက်ဇ်ဟာ ကျွန်တော်တို့အသင်းက လူငယ်ကစားသမားတွေအတွက် စံနမူနာယူစရာကစားသမားဖြစ်ပြီး သူ့ကြောင့် အသင်းဟာ ပိုကောင်းလာပါတယ်”ဟု ပြောကြားခဲ့သည်။
ဆွာရက်ဇ်သည် ယခုရာသီတွင် အက်သလက်တီကိုအသင်းအတွက် လာလီဂါ (၁၀)ပွဲတွင် (၇)ဂိုး သွင်းယူပေးထားသည်။
အက်သလက်တီကိုအသင်းသည် ယခုရာသီ လာလီဂါပြိုင်ပွဲတွင် (၁၃)ပွဲကစားထားရာ (၁၀)ပွဲနိုင်၊ (၂)ပွဲသရေ၊ (၁)ပွဲရှုံး ရလဒ် ထွက်ပေါ်ထားပြီး ရမှတ် (၃၂)မှတ်ဖြင့် အမှတ်ပေးဇယား အဆင့်နေရာ(၁)၌ ရပ်တည်နေသည်။
