ဆီဗီလာအသင်း၏ အားကစားဒါရိုက်တာဖြစ်သူ မွန်ချီသည် ၂၀၂၀ ယူရိုပါလိဂ်ပြိုင်ပွဲတွင်ဗိုလ်စွဲပြီးနောက် အသင်းအား နောက်ထပ်အဆင့်တစ်ခုသို့ ရောက်ရှိစေရန်စီစဉ်နေကြောင်း စပိန်အားကစားသတင်းစာ Marca က ဖော်ပြခဲ့သည်။ ပြီးခဲ့သည့် သြဂုတ် (၂၂)ရက်နေ့ က ယှဉ်ပြိုင်ခဲ့သော ယူရိုပါလိဂ်ဗိုလ်လု ပွဲတွင် ဆီဗီလာအသင်းသည် စီးရီးအေ ကလပ် အင်တာမီလန်အသင်းအား (၃-၂)ဂိုးဖြင့် အနိုင်ယူပြီးနောက် ယူရို ပါလိဂ်ချန်ပီယံဆုအား စံချိန်တင် (၆) ကြိမ်မြောက်ဆွတ်ခူးခဲ့သည်။
ထို့ကြောင့် မွန်ချီအနေဖြင့် အသင်းအား လာမည့်ရာသီသစ်တွင် လိုအပ်သည့်ကစားသမားဖြည့်တင်းမှုများပြုလုပ်ပြီး နောက်ထပ်အဆင့်တစ်ခုတက်ရောက်နိုင်ရန် စီစဉ်နေခြင်းဖြစ်သည်။ ပြီးခဲ့သည့် ၂၀၁၉-၂၀ ဘောလုံးရာသီတွင် ဆီဗီ လာအသင်းအတွက် ခြေစွမ်းပြခဲ့သည့် ရယ်ဂီလွန်မှာ အငှားစာချုပ်သက်တမ်းပြည့်ပြီးနောက် ရီးယဲလ်အသင်းထံ ပြန်လည်ပြောင်းရွှေ့မည်ဖြစ်ပြီး၊ ကွင်းလယ်လူ ဘာနီဂါမှာလည်း ဆော်ဒီအာရေဗျကလပ် အယ်လ်ရှာဘတ်အသင်းသို့ ပြောင်းရွှေ့မည်ဖြစ်သည်။
ထို့ကြောင့် မွန်ချီအနေဖြင့် လစ်လပ်သွားသည့် ကစားသမားများနေရာအတွက် ကစားသမားသစ်အစားထိုးခေါ်ယူမှုများ ပြုလုပ်မည်ဖြစ်သလို၊ အသင်းအနေဖြင့် ချန်ပီယံလိဂ်ပြိုင်ပွဲကို ဝင်ရောက်ယှဉ်ပြိုင်ရမည်ဖြစ်ရာ ပြိုင်ပွဲ အဆင့်အတန်းနှင့်ကိုက်ညီသည့် အရည်အသွေးမျိုးပြသနိုင်ရန် ဆန္ဒရှိနေခြင်းဖြစ်သည်။ ဆီဗီလာအသင်းသည် ယူရိုပါလိဂ်ပြိုင်ပွဲတွင် ချန်ပီယံဆု (၆) ကြိမ်ဖြင့် အအောင်မြင်ဆုံးအသင်းအဖြစ်ရပ်တည်နေသော်လည်း ချန်ပီယံလိဂ်ပြိုင်ပွဲတွင်မူ ၂၀၁၇-၁၈ ရာသီက ကွာတားဖိုင်နယ်တက်ရောက်ခြင်းကသာ အမြင့်ဆုံးအောင်မြင်မှုဖြစ်ခဲ့သည်။ ထို့ကြောင့် အသင်း၏အားကစားဒါရိုက်တာဖြစ်သူ မွန်ချီက ချန်ပီယံလိဂ်ပြိုင်ပွဲအဆင့်အတန်းနှင့်ကိုက်ညီသည့် အသင်းအဖြစ်တည်ဆောက်ရန် စီစဉ်နေခြင်းဖြစ်ပြီး နည်းပြ လိုပယ်တယ်ဟီနှင့်ပူးပေါင်းကာ အကောင်အထည်ဖော်သွားမည်ဖြစ်ကြောင်း သိရသည်။
