ဆာလာ၏စာချုပ်ကိစ္စအပေါ် လီဗာပူးလ်အသင်း ကိုင်တွယ်ပုံမှာ လက်ခံနိုင်စရာမရှိဘဲ အမြန်ဆုံးဖြေရှင်းသင့်သည်ဟု အိုဟာရာ တိုက်တွန်း

စပါးနှင့် အင်္ဂလန်ကွင်းလယ်လူဟောင်း ဂျေမီအိုဟာရာက အီဂျစ်လက်ရွေးစင်တိုက်စစ်ကစားသမား ဆာလာ၏ စာချုပ်ကိစ္စအပေါ် လီဗာပူးလ်အသင်း၏ကိုင်တွယ်ပုံမှာ လက်ခံနိုင်စရာမရှိဘဲ အမြန်ဆုံးဖြေရှင်းသင့်သည်ဟု တိုက်တွန်းပြောကြားခဲ့သည်။

လီဗာပူးလ်အသင်းသည် ယခုလတွင် အသင်းတိုက်စစ်ကစားသမား မာနေအား ဘိုင်ယန်မြူးနစ်အသင်းထံ ရောင်းချခဲ့ပြီးနောက် အသင်း၏နာမည်ကျော်တိုက်စစ်အတွဲမှာ ပျက်စီးသွားပြီဖြစ်သလို၊ ဆာလာ၏အနာဂတ်မှာလည်း လှုပ်ခတ်လျက်ရှိသည်။

ဆာလာ၏လက်ရှိစာချုပ်မှာ ၂၀၂၃ တွင် ကုန်ဆုံးမည်ဖြစ်ပြီး လီဗာပူးလ်အသင်းက စာချုပ်သက်တမ်းတိုးရန် ကြိုးပမ်းခဲ့သည်မှာ တစ်နှစ်နီးပါး ရှိပြီဖြစ်သော်လည်း သဘောတူညီမရသေးဘဲ ယခုအခါ ဆွေးနွေးမှုပင် ရပ်ဆိုင်းထားကြောင်း သိရသည်။

ဆာလာက မိမိအနေဖြင့် လာမည့် ၂၀၂၂-၂၃ ရာသီ လီဗာပူးလ်အသင်းတွင် ဆက်ရှိနေမည်ဟု ကတိပေးထားသော်လည်း စာချုပ်သစ်ချုပ်ဆိုနိုင်ခြင်းမရှိပါက ၂၀၂၃ တွင် ပြောင်းရွှေ့ကြေးအလွတ်ဖြင့် လက်လွှတ်ရမည်ဖြစ်သည်။

ထို့ကြောင့် လီဗာပူးလ်အသင်းသည် ဆာလာအတွက် ပေါင်သန်း (၆၀)ဖြင့် ကမ်းလှမ်းမှုရှိလာပါက လက်လွှတ်ဖွယ်ရှိသည်ဟုလည်း သတင်းထွက်နေသည်။

အိုဟာရာက ”ဆာလာက စာချုပ်နောက်ဆုံးနှစ် ရောက်နေပြီး စာချုပ်သစ် မချုပ်ရသေးပါဘူး။ အခု ဆာလာအနေနဲ့ လာမယ့်နှစ်မှာ ပြောင်းရွှေ့ကြေးအလွတ်နဲ့ ထွက်ခွာခွင့်ရှိနေတယ်။ ဒါက လက်ခံနိုင်စရာမရှိပါဘူး။ လီဗာပူးလ်ဟာ ကစားသမားအပြောင်းအရွှေ့ကိစ္စတွေနဲ့ပတ်သက်လို့ အကောင်းဆုံးလုပ်ဆောင်နေပေမဲ့ ဆာလာ ဒီအခြေအနေအထိ ရောက်လာတာတော့ အံ့သြစရာကောင်းပါတယ်။ လီဗာပူးလ်အနေနဲ့ ဆာလာကို လက်မလွှတ်ရအောင် ဖြေရှင်းသင့်ပါတယ်”ဟု ဆိုခဲ့သည်။