ပေါ်တူဂီအသင်း၏ပရိသတ်များသည် ၀ါရင့်တိုက်စစ်မှူး စီရော်နယ်လ်ဒိုကို အသင်းတွင် ပြန်ကစားစေလိုခြင်းမရှိတော့ဘဲ လာမည့် မော်ရိုကိုနှင့်ကွာတားဖိုင်နယ်ပွဲတွင်လည်း လူငယ်တိုက်စစ်မှူး ဂွန်ဆာလိုဟယ်မို့စ်ကိုသာ ပွဲထွက်စေလိုကြကြောင်း သိရသည်။
ပေါ်တူဂီအသင်းသည် ၂၀၂၂ ကမ္ဘာ့ဖလားပြိုင်ပွဲ၌ အုပ်စု (၂)ပွဲကစားအပြီးမှာပင် နောက်တစ်ဆင့် တက်ရောက်ခွင့်ရရှိခဲ့ပြီး အုပ်စုနောက်ဆုံးပွဲ၌ တောင်ကိုရီးယားအသင်းကို ရှုံးနိမ့်ခဲ့သည်။
ထို့ကြောင့် အုပ်စုပွဲစဉ် (၃)ပွဲစလုံး၌ ပွဲထွက်ကစားသမားအဖြစ် ပါဝင်ကစားပြီး (၁) ဂိုးသာ သွင်းယူနိုင်ခဲ့သည့် အသင်း ခေါင်းဆောင် ၀ါရင့်တိုက်စစ်မှူး စီရော်နယ်လ်ဒိုကို ဆွစ်ဇာလန်နှင့် ယှဉ်ပြိုင်သည့် ရှုံးထွက်(၁၆)သင်းအဆင့်တွင် လူစားဝင်ကစားသမားအဖြစ်သာ အသုံးပြုခဲ့သည်။
ယင်းပွဲတွင် ပေါ်တူဂီအသင်းက ဂိုးဒါဇင်ဝက်သွင်းကာ အနိုင်ရရှိခဲ့သလို၊ စီရော်နယ်လ်ဒိုအစား ပွဲထွက်ကစားခဲ့သည့် လူငယ်ကစားသမား ဂွန်ဆာလိုဟယ်မို့စ်က ဟက်ထရစ်သွင်းယူခဲ့သည်။
