ဘာစီလိုနာဥက္ကဋ္ဌဟောင်း လာပေါ်တာက မိမိသည် စီရော်နယ်လ်ဒိုအား ခေါ်ယူခွင့်ရခဲ့သော်လည်း မခေါ်ယူခဲ့ခြင်းဖြစ်ပြီး ယင်းအတွက် နောင်တမရကြောင်း Iniestazo မီဒီယာနှင့် အင်တာဗျူးတွင် ဖွင့်ဟခဲ့သည်။
လာပေါ်တာသည် ဘာစီလိုနာအသင်းတွင် ဥက္ကဋ္ဌအဖြစ် ၂၀၀၃ ခုနှစ်မှ ၂၀၁၀ အထိ တာဝန်ထမ်းဆောင်ခဲ့သူဖြစ်ပြီး လာမည့်ဘာစီလိုနာဥက္ကဋ္ဌ ရွေးကောက်ပွဲတွင်လည်း ဝင်ရောက်ယှဉ်ပြိုင်မည့်သူဖြစ်သည်။
လာပေါ်တာက မိမိ ဘာစီလိုနာဥက္ကဋ္ဌအဖြစ် တာဝန်ယူခဲ့စဉ်က စီရော်နယ်လ်ဒိုအား ခေါ်ယူရန် အခွင့်အရေးရခဲ့သော်လည်း ရော်နယ်လ်ဒင်ဟိုအတွက် မြှုပ်နှံခဲ့ပြီးဖြစ်၍ ထိုအခွင့်အရေးကို ငြင်းပယ်ခဲ့ခြင်းဖြစ်ကြောင်း ဝန်ခံခဲ့ခြင်းဖြစ်သည်။
လာပေါ်တာက ”ကျွန်တော်တို့က ရော်နယ်လ်ဒင်ဟိုနဲ့ မားကွက်ဇ်တို့ကို ခေါ်ယူနိုင်တော့မယ့်အချိန်ပါ။ မားကွက်ဇ်ဘက်က အေးဂျင့်တွေက စီရော်နယ်လ်ဒိုအကြောင်း မိတ်ဆက်ခဲ့ကြပါတယ်။ အဲဒီအချိန်မှာ သူက စပို့တင်းလစ္စဘွန်းမှာပါ။ အေးဂျင့်တစ်ယောက်က မန်ယူအသင်းဆီ ယူရို (၁၉)သန်းနဲ့ ရောင်းချမယ့် ကစားသမားရှိကြောင်း၊ ကျွန်တော်တို့ ဝယ်မယ်ဆိုရင် ယူရို(၁၇)သန်းနဲ့ ရအောင်လုပ်ပေးမယ့်အကြောင်း ပြောခဲ့တယ်။ ဒါပေမဲ့ ရော်နယ်လ်ဒင်ဟိုအတွက် ရင်းနှီးမြှုပ်နှံပြီးသား ဖြစ်နေပါပြီ။ စီရော်နယ်လ်ဒိုက ဗဟိုထက် တောင်ပံမှာ ကစားနေတာပါ။ ကျွန်တော်တို့မှာ ရှိနေပြီးသားလို့ ယူဆပြီး မဝယ်ခဲ့ပါဘူး။ ဒီဆုံးဖြတ်ချက်အတွက် နောင်တမရပါဘူး”ဟု ပြောကြားခဲ့သည်။
