စီရော်နယ်လ်ဒိုနှင့် လမ်းခွဲပြီးနောက် အသင်းတိုက်စစ်ပိုင်းကို ဂက်ပို၊ လီယာအိုတို့နှင့် ပြန်လည်အားဖြည့်ရန် တန်ဟက်ဂ် ပစ်မှတ်ထား

စီရော်နယ်လ်ဒိုနှင့် လမ်းခွဲပြီးနောက် အသင်းတိုက်စစ်ပိုင်းကို အေစီမီလန်အသင်းမှ လီယာအို၊ PSV အသင်းမှ ဂက်ပိုတို့နှင့် ပြန်လည်အစားထိုးရန် မန်ယူအသင်းနည်းပြ တန်ဟက်ဂ်က ပစ်မှတ်ထားနေကြောင်း သိရသည်။

မန်ယူအသင်းသည် ဂက်ပိုနှင့် လီယာအိုကို ပြီးခဲ့သည့်နွေရာသီကတည်းက စိတ်ဝင်စားခဲ့ခြင်းဖြစ်သည်ဟု ESPN သတင်းဌာနက ဖော်ပြခဲ့သည်။

စီရော်နယ်လ်ဒို မရှိတော့သည့်နောက် မန်ယူတိုက်စစ်ပိုင်းတွင် မာစီယဲလ်နှင့် ရပ်ရှ်ဖို့ဒ်တို့ရှိသော်လည်း နည်းပြ တန်ဟက်ဂ်က ပရိသတ်ကျေနပ်စေရန်အတွက် စီရော်နယ်လ်ဒိုနေရာအစားထိုးရန် ပြင်ဆင်နေခြင်းဖြစ်သည်။

မန်ယူအသင်းသည် နွေရာသီအပြောင်းအရွှေ့ကာလတွင် အန်တိုနီ၊ ကက်စီမီရို၊ လီဆန်ဒရိုမာတီနက်ဇ် နှင့် မာလာစီယာတို့ကို ခေါ်ယူမှုအတွက် ပေါင် သန်း(၂၂၀)ဝန်းကျင် အသုံးပြုခဲ့သဖြင့် ဆောင်းရာသီတွင် ကစားသမားသစ်ဖြည့်တင်းမည့် အစီအ စဉ်မရှိသော်လည်း စီရော်နယ်လ်ဒိုကို စာချုပ်ဖျက်သိမ်းခြင်းကြောင့် ပေါင် (၁၆)သန်း ပိုထွက်လာ၍ အပြောင်းအရွှေ့သတင်းများလည်း ထွက်ရှိလာခြင်းဖြစ်သည်။

ဂက်ပိုနှင့် လီယာအိုတို့ကို ပစ်မှတ်ထားသည့်အသင်းများစွာ ရှိနေပြီး ယင်းကစားသမား(၂)ဦးမှာ ကမ္ဘာ့ဖလားပြိုင်ပွဲတွင်လည်း ဂိုးများသွင်းယူထားနိုင်သောကြောင့် တန်ဖိုးပိုမိုမြင့်တက်လာဖွယ်ရှိသည်။

ဂက်ပိုသည် နွေရာသီက မန်ယူနှင့်သတင်းထွက်ခဲ့သော်လည်း နောက်ပိုင်းတွင် တန်ဟက်ဂ်က အန်တိုနီကို ပြောင်းလဲခေါ်ယူခဲ့ခြင်းဖြစ်သည်။