ဂျူဗင်တပ်စ်အသင်းသည် တိုက်စစ်မှူး စီရော်နယ်လ်ဒိုကို COVID-19 ရောဂါစစ်ဆေးမှု ထပ်မံ ပြုလုပ်ထားပြီး ဘာစီလိုနာအသင်း နှင့်ပွဲမတိုင်မီ ၂၄ နာရီအလိုတွင် Negative အဖြေထွက်ပါက ပါဝင်ခွင့်ရမည်ဖြစ်ကြောင်း သိရသည်။
ပုံမှန်အားဖြင့် စီရော်နယ်လ်ဒိုသည် အောက်တိုဘာ ၂၈ ရက်ကစားမည့် ဘာစီလိုနာနှင့်ပွဲမတိုင်မီ တစ်ပတ်အလိုတွင် Negative အဖြေ ထွက်ရန် လိုအပ်သော်လည်း ၎င်း၏ စစ်ဆေးမှုရလဒ်၌ ဗိုင်းရပ်စ်တွေ့ရှိမှု ပမာဏ အလွန်နည်းပါးသည့် ဆေးမှတ်တမ်းကို ဂျူဗင်တပ်စ်အသင်းက ဥရောပဘောလုံးအဖွဲ့ချုပ်(UEFA) ထံ တင်ပြခဲ့ကြောင်း သိရသည်။
သို့ဖြစ်ရာ UEFA က ပွဲမတိုင်မီ ၂၄ နာရီအလိုတွင် Negative အဖြေ ထွက်ပါက ပါဝင်ကစားရန် ခွင့်ပြုထားခြင်းဖြစ်သည်။ စီရော်နယ်လ်ဒိုသည် ကြာသပတေးနေ့က ဒုတိယအကြိမ် စစ်ဆေးမှုတွင် Positive အဖြေထွက်ထားသော်လည်း စနေနေ့တွင် တတိယအကြိမ် ထပ်မံစစ်ဆေးထားပြီး အဖြေကို စောင့်နေကြောင်း ဂျူဗင်တပ်စ်အသင်းနည်းပြ ပီယာလိုက အတည်ပြုပြောကြားခဲ့သည်။
“ခရစ္စတီယာနိုရော်နယ်လ်ဒို နဲ့ပတ်သက်လို့ သတင်းအသစ်မရှိသေးပါဘူး။ Swab ရလဒ်ကို ကျွန်တော်တို့လည်း စောင့်နေပါတယ်။ ဒီနေ့နံနက်မှာ ကျွန်တော်တို့ Swab ယူခဲ့ပါတယ်။ သူက သူ့ရဲ့အိမ်မှာပဲ စစ်ဆေးမှုခံယူခဲ့တာပါ။ ပြောစရာ သတင်းအသစ်ရှိလာရင် ကြေညာပေးမှာပါ” ဟု ပီယာလိုက မနေ့က သတင်းထောက်များအား ပြောကြားခဲ့သည်။
စီရော်နယ်လ်ဒို Positive တွေ့ရှိပြီး နောက်တစ်ရက်တွင် Positive တွေ့ရှိခဲ့သူ အမေရိကန်ကွင်းလယ်လူ မက်ကန်နီးမှာလည်း သောကြာနေ့တွင် Negative ရလဒ်ထွက် ပေါ်ခဲ့ကြောင်း ဂျူဗင်တပ်စ်အသင်းက အတည်ပြုကြေညာခဲ့သည်။
“ဝက်စတန်မက်ကန်နီးအနေ ဖြင့် လုပ်ထုံးလုပ်နည်းအရ ကိုရိုနာဗိုင်းရပ်စ်အတွက် ရောဂါရှာဖွေစမ်းသပ်မှုပြုလုပ်ခဲ့ပါသည်။ စစ်ဆေးမှုရလဒ်အရ Negative အဖြေထွက်ခဲ့ပါသည်။ သို့ဖြစ်ရာ ကစားသမားအနေဖြင့် နေအိမ်တွင် သီးခြားခွဲ၍ နေထိုင်ရန် မလိုအပ်တော့ပါ” ဟု ဂျူဗင်တပ်စ်အသင်း၏ ထုတ်ပြန်ချက်တွင် ဖော်ပြထားသည်။
မက်ကန်နီးတွင် Negative တွေ့ရှိသဖြင့် ဂျူဗင်တပ်စ်တစ်သင်းလုံးလည်း ဟိုတယ်၌ သီးခြားခွဲ၍ နေထိုင်ရလျက်ရှိပြီး ၎င်းအနေဖြင့် Negative ပြန်ဖြစ်သွားသလို အခြားသူအားလုံးလည်း Negative အဖြေထွက်ခဲ့သောကြောင့် Quarantine နေရန် မလိုတော့ကြောင်း သိရသည်။ ဂျူဗင်တပ်စ်-ဘာစီလိုနာပွဲမှာ ၂၀၁၈ နောက်ပိုင်း စီရော်နယ်လ်ဒိုနှင့် မက်ဆီတို့ တစ်ကျော့ပြန်ဆုံတွေ့မည့်ပွဲ ဖြစ်သည်။
