ဘာစီလိုနာအသင်းသည် စာချုပ်သက်တမ်း (၁)လကျန်ရှိနေသော်လည်း အသင်းနှင့်လေ့ကျင့်ခန်းဆင်းခြင်းမရှိသည့် ဘရာဇီးလ်ကွင်းလယ်လူ အာသာအား တရားစွဲဆိုထားကြောင်း စပိန်အားကစားသတင်းစာ Marca က ဖော်ပြခဲ့သည်။
အသက်(၂၃)နှစ်အရွယ်ရှိ အာသာသည် ယခုရာသီ ချန်ပီယံလိဂ်ပြိုင်ပွဲအပြီးတွင် ဂျူဗင်တပ်စ်အသင်းသို့ ပြောင်းရွှေ့မည်ဖြစ်ပြီး လက်ကျန်စာချုပ်သက်တမ်း (၁)လကို ဖျက်သိမ်းရန် ဘာစီလိုနာအသင်းထံ တောင်းဆိုခဲ့ကြောင်း သိရသည်။
သို့သော် ဘာစီလိုနာအသင်းသည် အာသာ၏ တောင်းဆိုမှုကို လက်ခံခြင်းမရှိဘဲ အသင်းနှင့် လေ့ကျင့်ခန်းဆင်းရန် ညွှန်ကြားခဲ့သည်။
အာသာသည် ဇူလိုင်လ (၂၇)ရက်ကပြုလုပ်သည့် ဘာစီလိုနာကစားသမားများအား ဗိုင်းရပ်စ်ပိုး ရှိ၊ မရှိ စစ်ဆေးမှုကို လာရောက်ခဲ့ခြင်းမရှိသလို၊ ဇူလိုင်လ (၂၈)ရက်က ပြုလုပ်ခဲ့သည့် အသင်း၏ လေ့ကျင့်ရေးအစီအစဉ်ကို လာရောက်ခဲ့ခြင်းမရှိကြောင်း သိရှိရသည်။
အာသာသည် ဘာစီလိုနာအသင်းမှ ထွက်ခွာလိုခြင်းမရှိကြောင်း ကြိမ်ဖန်များစွာ ပြောဆိုခဲ့သော်လည်း ဘာစီလိုနာအသင်းက ၎င်းကို ဂျူဗင်တပ်စ်အသင်းထံ ရောင်းချခဲ့ခြင်းအတွက် အသင်းကို မကျေမနပ်ဖြစ်နေကြောင်း သိရသည်။
ထို့ကြောင့် အာသာသည် စာချုပ်သက်တမ်း (၁)လ ကျန်ရှိနေသေးသော်လည်း အသင်းအတွက် ကစားပေးလိုခြင်းမရှိတော့ဘဲ စာချုပ်ဖျက်သိမ်းရန် တောင်းဆိုခဲ့ခြင်းဖြစ်သည်။
ဘာစီလိုနာအသင်းသည် အသင်း၏ညွှန်ကြားမှုနှင့် စည်းကမ်းကို လိုက်နာခြင်းမရှိသည့် အာသာအား တရားစွဲဆိုခဲ့ခြင်းဖြစ်သည်။ အာသာအနေဖြင့် အသင်း၏စည်းကမ်းကို ဖောက်ဖျက်မှုဖြင့် ဒဏ်ရိုက်ခံရဖွယ်ရှိနေကြောင်း သိရှိရသည်။
