ဘရာဇီးလ်တိုက်စစ်မှူး နေမာနှင့် PSG အသင်းတို့ ချုပ်ဆိုထားသည့် စာချုပ်ပါစည်း မျဉ်းအရ ၎င်း၏စာချုပ်မှာ ဇူလိုင် ၁ ရက်မှစ၍ ၂၀၂၇ ခုနှစ်အထိ အလိုအလျောက် သက်တမ်းတိုးမြှင့်သွားမည်ဖြစ်ကြောင်း ပြင်သစ်နိုင်ငံထုတ် L’Equipe သတင်းစာ၏ဖော်ပြမှုအရ သိရသည်။
အသက် ၃၀ ရှိပြီဖြစ်သည့် နေမာနှင့် PSG အသင်း၏ လက်ရှိစာချုပ်သက်တမ်းမှာ ၂၀၂၅ ခုနှစ်အထိဖြစ်ပြီး ပြီးခဲ့သည့်နှစ် မေလတွင် အသစ်ထပ်မံချုပ်ဆိုထားခြင်းဖြစ်သည်။
နေမာသည် ယခုနှစ် နွေရာသီတွင် အပြောင်း အရွှေ့သတင်းများထွက်ပေါ်လျက်ရှိသော်လည်း စာချုပ်ပါစည်းကမ်းချက်များအရ ၎င်း၏စာချုပ်မှာ ဇူလိုင် ၁ ရက်မှစ၍ ၂၀၂၇ ခုနှစ် အထိ အလိုအလျောက် တိုးမြှင့်သွားမည်ဖြစ်ကြောင်း L’Equipe သတင်းစာက ဖော်ပြခဲ့သည်။
သို့ဖြစ်ရာ ၎င်းအနေဖြင့် ဇွန်လမကုန်မီ အသင်းပြောင်းရွှေ့ခြင်းမရှိပါက စာချုပ်စည်းမျဉ်းအရ PSG အသင်း၌ အသက် ၃၅ နှစ် အရွယ်အထိ ဆက်နေခွင့်ရဖွယ်ရှိနေသည်။
PSG အသင်းဥက္ကဋ္ဌ အယ်လ်ခီလိုင်ဖီကမူ နေမာ ထွက်ခွာနိုင်သည့် သတင်းများကို အတည်ပြုခြင်း၊ ငြင်းဆန်ခြင်းမရှိကြောင်း သိရသည်။
“အသင်းကိုချစ်တဲ့သူ၊ တိုက်ပွဲဝင်ရတာ နှစ်သက်တဲ့သူ၊ နိုင်ပွဲရချင်တဲ့သူတွေကိုပဲ ကျွန်တော်တို့ လိုချင်ပါတယ်။ ပြီးခဲ့တဲ့ရာသီ မှာ ၁၀၀ ရာခိုင်နှုန်းကြိုးစားတာက လုံလောက်မှုမရှိလို့ လာမယ့်ရာသီမှာ နေ့စဉ်နေ့တိုင်း ၂၀၀ ရာခိုင်နှုန်း ကြိုးစားရမှာ သေချာပါတယ်”ဟု အယ်လ်ခီလိုင်ဖီက ပြောကြားသည်။
