ဂျာမနီနှင့်ကစားသည့်ပွဲတွင် တံကောက်ကြောဒဏ်ရာရရှိခဲ့သည့် စပိန်ဝါရင့်နောက်ခံလူ ဆာဂျီယိုရာမို့စ်သည် ကာလကြာရှည် အနားယူရဖွယ်မရှိကြောင်း စပိန်အသင်းနည်းပြ လူးဝစ်အင်းနရစ်က ပွဲအပြီးတွင် ပြောကြားသည်။
ယင်းပွဲတွင် ပွဲချိန် ၄၃ မိနစ်၌ ရာမို့စ် ဒဏ်ရာရရှိသွားမှုကြောင့် မန်စီးတီးနောက်ခံလူ အဲရစ်ဂါစီယာနှင့် လူစားလဲခဲ့ရခြင်းဖြစ်သည်။
ရာမို့စ်ဒဏ်ရာရမှုမတိုင်မီ ကွင်းလယ်ကစားသမားဖြစ်သူ ကာနာလက်စ်မှာလည်း တံကောက်ကြောဒဏ်ရာရရှိမှုကြောင့် ပွဲအစ ၁၂ မိနစ်ကတည်းကပင် လူစားလဲခဲ့ရသည်။
ယင်းကစားသမားနှစ်ဦး၏ ဒဏ်ရာအခြေအနေနှင့်ပတ်သက်ပြီး နည်းပြ အင်းနရစ်က ယခုကဲ့သို့ ရှင်းလင်းခဲ့သည်။
‘ဒဏ်ရာတွေက အသေးစားတွေပါ။ သူတို့ ကာလတိုလောက်ပဲအနားယူရဖို့ ကျွန်တော် မျှော်လင့်ပါတယ်”ဟု အင်းနရစ်က ပြောကြားခဲ့သည်။
ဂျာမနီနှင့်ပွဲမှ စပိန်ကစားသမားများ၏ခြေစွမ်းနှင့်ပတ်သက်ပြီး အင်းနရစ်က ”အရင်ပွဲတွေမှာလည်း အသင်းကစားပုံက သာလွန်ခဲ့ပါတယ်။ ဒါပေမဲ့ ထိုက်တန်တဲ့ရလဒ် မရရှိခဲ့ပါဘူး။ နောက်ဆုံးလေးသင်းအဆင့်မှာ ကစားရတာ ချိုမြိန်ပါတယ်။ အလွန်စွမ်းဆောင်ရည်ကောင်းတဲ့ ကစားသမား ၃၀ ဦးလောက် ကျွန်တော်တို့အသင်းမှာ ရှိပါတယ်။ အသင်းရဲ့တိုက်စစ်ကလည်း စွမ်းဆောင်ရည်ကောင်းပြသနိုင်ခဲ့ပြီး ကစားသမားအတော်များများ ဂိုးသွင်းနိုင်ခဲ့ပါတယ်”ဟု ပြောကြားခဲ့သည်။
