မန်စီးတီးအသင်းနှင့် ဂွါဒီယိုလာတို့ သက်တမ်းတိုးစာချုပ်ချုပ်ဆိုရန် မူအားဖြင့် သဘောတူညီမှုရခဲ့ပြီဆိုသောသတင်းကြောင့် ဒေါ့မွန်တိုက်စစ်မှူး ဟော်လန်းအနေဖြင့် မန်စီးတီးသို့ ရောက်ရှိရန် သေချာပြီဟု ထင်ကြေးပေးမှုများ ထွက်ပေါ်လာခဲ့သည်။
မန်စီးတီးအသင်းသည် တိုက်စစ်မှူးစစ်စစ် အားဖြည့်ရန်အတွက် ဟော်လန်းကို ပစ်မှတ်ထားခဲ့ပြီး လာမည့်နွေရာသီ၌ ခေါ်ယူရန် သဘောတူညီမှုရရှိထားပြီဟု ပြီးခဲ့သည့်ရက်ပိုင်းအတွင်းက သတင်းထွက်ခဲ့သည်။
သို့သော် တရားဝင်အတည်ပြုနိုင်ခြင်းမရှိသေးဘဲ ဟော်လန်းက နည်းပြ ဂွါဒီယိုလာ၏ အနာဂတ်အတွက် ဆုံးဖြတ်ချက်ကို စောင့်ကြည့်နေခဲ့ကြောင်း သိရသည်။
ထိပ်သီးအသင်းများစွာ၏ ခေါ်ယူရန် စိတ်ဝင်စားခြင်းခံနေရသည့် ဟော်လန်းက နည်းပြ ဂွါဒီယိုလာ ကာလရှည်ဆက်ရှိရန် သေချာမှသာ မန်စီးတီးသို့ ပြောင်းရွှေ့ရန် လိုလားခြင်းဖြစ်ကြောင်းလည်း သိရသည်။
ထို့ကြောင့် မန်စီးတီးနှင့် ဂွါဒီယိုလာတို့ စာချုပ်သက်တမ်းတိုးတော့မည်ဟု သတင်းထွက်လာခြင်းမှာ ဟော်လန်း မန်စီးတီးကို ရွေးချယ်ရန်နှင့် အပြီးသတ်ဆုံးဖြတ်ချက်ချမှတ်ရန်အတွက် တွန်းအားပေးလိုက်ခြင်းဟု သုံးသပ်သူများလည်းရှိလာခဲ့သည်။
