လော်ရီယန့် နည်းပြဟောင်း လန်ဒရို က အာဆင်နယ် အသင်းရဲ့ ပြင်သစ် လူငယ် ကွင်းလယ်လူ ဂွမ်ဒူဇီ ဟာ ကိုင်တွယ်ဖို့ ခက်ခဲတဲ့ ကစားသမား တစ်ဦး ဖြစ်ပြီး ဝန်ခံလိုက်ပြီး သူ့ကို ကပ္ပတိန် ရာထူး တာဝန်မျိုး ပေးထားမှသာ အဆင်ပြေလိမ့်မယ်လို့ အကြံဉာဏ် ပေးသွားခဲ့ပါတယ် ။
ဂွမ်ဒူဇီဟာ ပြီးခဲ့တဲ့ ၂၀၁၈ ခုနှစ်တုန်းကမှ ပြင်သစ် လီဂူး ကလပ်လော်ရီယန့် အသင်းကနေ အာဆင်နယ် အသင်းကို ပြောင်းရွှေ့ရောက်ရှိလာသူ ဖြစ်ပြီး အချိန်တိုလေး အတွင်းမှာ နည်းပြ အမ်မရီ လက်အောက်တွင် ပွဲထွက် ကစားခွင့် မြောက်များစွာ ရရှိခဲ့တဲ့ လူငယ် ကြယ်ပွင့် တစ်ဦးပါ ။
ဂွမ်ဒူဇီ ဟာ အမ်မရီ ထုတ်ပယ် ခံရပြီးနောက် အာတီတာ လက်ထက် အစမှာလည်း ကစားခွင့် ရရှိခဲ့ပေမယ့် နောက်ပိုင်းမှာတော့ စည်းကမ်းပိုင်းဆိုင်ရာ ပြဿနာတွေကြောင့် လူစာရင်းကနေ ချန်လှပ်ခံခဲ့ရပါတယ် ။
ဘောလုံးပွဲတွေ ပြန်လည် စတင်တဲ့ အချိန်မှာလဘ်း ဂွမ်ဒူဇီ ဟာ ကစားခွင့် ရခဲ့သေးပေမယ့် ဘရိုက်တန် နဲ့ ပွဲမှာ ပြိုင်ဘက် ကစားသမားကို မသင့်လျော်တဲ့ အပြုအမူ ၊ အပြောအဆိုတွေ လုပ်ခဲ့တာကြောင့် နည်းပြ အာတီတာ ဟာ ပြင်သစ်သားကို တစ်ဦးတည်း လေ့ကျင့်ခန်း ဆင်းစေခဲ့ပြီး ရာသီကုန်အထိ အသုံးပြုခြင်း မရှိတော့ပါဘူး ။
ဒါကြောင့် အာဆင်နယ် အသင်းဟာ ပြီးခဲ့တဲ့ နွေရာသီ အပြောင်းအရွှေ့ ကာလမှာတော့ လူငယ် ကွင်းလယ်လူ မက်တီယို ဂွမ်ဒူဇီ ကို ဟာသာဘာလင် အသင်းထံ တစ်ရာသီ အငှား ပြောင်းရွှေ့ကစားစေ ခဲ့ပါတယ် ။
ဂွမ်ဒူဇီ ဟာ ဟာသာဘာလင် အသင်းကို ရောက်ရောက်ချင်းမှာပဲ Covid-19 positive ဖြစ်နေတာကြောင့် ချက်ချင်း ကစားခွင့် မရရှိ ခဲ့ပါဘူး ။ Covid-19 ရောဂါ ပျောက်သွားချိန်မှာတော့ ဂွမ်ဒူဇီ ဟာ ဟာသာဘာလင် အသင်း အတွက် ၂ ပွဲ ပါဝင် ကစားပေးထားပြီး ဖြစ်ပါတယ် ။
ဂွမ်ဒူဇီ ကို ၂၀၁၇ ခုနှစ်ကနေ ၂၀၁၈ ခုနှစ် အထိ ကိုင်တွယ် ခဲ့ဖူးတဲ့ လော်ရီယန့် နည်းပြဟောင်း လန်ဒရို က ပြင်သစ်သားဟာ အရည်အသွေးကောင်းတွေ ရှိပေမယ့် ကိုယ့်ကိုယ်ကို အထင်ကြီးမှု က အစွန်းရောက်နေကြောင်း ပြောကြား လိုက်ပါတယ် ။
” သူ(ဂွမ်ဒူဇီ) က ကျနော့်ကို စိတ်ဆိုး ဒေါသ ထွက်အောင် ဆိုးဆိုးရွားရွား လုပ်ခဲ့ပါတယ် ၊ သူက ထိန်းချုပ် ကိုင်တွယ်ရ အတော် ခက်ခဲတဲ့ ကစားသမား တစ်ဦးပါ ။ တစ်ခါတစ်လေဆို အသင်းက ကစားသမားတွေအတွင်း သူ့ရဲ့ အပြုအမူက ကြမ်းတမ်းလွန်းပါတယ် ။ ”
” သူက ဘယ်သူ့ကိုမှ အလွယ်တကူ အလျော့မပေးတတ်ပါဘူး ၊ သူက တကယ့် ဖိုက်တာပါ ၊ သူက ကိုယ့်ကိုယ်ကို အထင်ကြီးလွန်း နေပါတယ် ၊ ဒါပေမယ့် သူ့အတွက်တော့ ဒါဟာ လိုအပ်တယ်လို့ မြင်ရင် မြင်နေမှာပါ ။ ”
” ကျွန်တော်ကတော့ သူ့ကို ပရိသတ် ပိုအာရုံစိုက်မိစေမယ့် တာဝန် နေရာ ပေးထားသင့်တယ်လို့ ထင်ပါတယ် ၊ အသင်း ခေါင်းဆောင် ဖြစ်ဖြစ် ဒုတိယ အသင်း ခေါင်းဆောင် ဖြစ်ဖြစ်ပေါ့ဗျာ ။ ”
” အသင်းဖော်တွေဘက်ကလည်း သူ့ရဲ့ အပြုအမူကို နားလည်လက်ခံ ပေးဖို့ လိုအပ်ပါတယ် ၊ ဘာကြောင့်လဲ ဆိုတော့ သူက နေ့တိုင်း အသင်းဖော်တွေကို ဒုက္ခ ပေးမှာ မို့လို့ ပါပဲ ၊ ဒါပေမယ့် တခြား တစ်ဖက်မှာလည်း သူက အရည်အသွေးမြင့် ကစားသမား တစ်ဦး ဖြစ်နေပါတယ် ။ ” လို့ ပြောကြား သွားခဲ့ပါတယ် ။
