မန်စီးတီးအသင်းတွင် အနာဂတ်မရေမရာဖြစ်နေသည့် ဘရာဇီးလ်တိုက်စစ်မှူး ဂါဘရီယဲလ်ဂျေးဇူး၏ အေးဂျင့်ဖြစ်သူ မာဆယ်လိုပတ်တီနာတီက အပြောင်းအရွှေ့အတွက် အာဆင်နယ်အသင်းနှင့် ဆွေးနွေးနေကြောင်း အတည်ပြုပြောကြားသည်။
ဂျေးဇူး (၂၅ နှစ်) ၏ စာချုပ်သက်တမ်းမှာ တစ်နှစ်သာကျန်ရှိပြီး မန်စီးတီးအသင်းက လာမည့်ရာသီအတွက် ဒေါ့မွန်အသင်း တိုက်စစ်မှူး ဟော်လန်းကို ခေါ်ယူနိုင်ခဲ့ပြီဖြစ်သောကြောင့် ၎င်းအနေဖြင့် ပုံမှန်ပွဲထွက်ခွင့်ရမည့်အခြေအနေမရှိတော့ကြောင်း သုံးသပ်မှုများ ရှိနေသည်။
ယင်းအခြေအနေနှင့်ပတ်သက်၍ အေးဂျင့်ဖြစ်သူ ပတ်တီနာတီက “ဂါဘရီယဲလ်ဂျေးဇူးအတွက် ကျွန်တော်တို့ အာဆင်နယ်အသင်းနဲ့ ဆွေးနွေးနေပါတယ်။ ကျွန်တော်တို့ ပရောဂျက်ကို သဘောကျပါတယ်။ အဲဒါက ကျွန်တော်တို့ဆွေးနွေးနေတဲ့ ဖြစ်နိုင်ခြေတစ်ခုပါ။ ဂါဘရီယဲလ်ကို စိတ်ဝင်စားနေတဲ့အသင်းက ခြောက်သင်းမက ရှိပါတယ်။ သူက မန်စီးတီးနဲ့ နောက်ဆုံးပွဲစဉ်တွေအတွက်ပဲ အာရုံစိုက်ထားပါတယ်”ဟု ဗုဒ္ဓဟူးနေ့တွင် ပြောကြားသည်။
ဂျေးဇူးသည် မန်စီးတီးကစားသမား ဘဝ ငါးရာသီခွဲအတွင်း ပြိုင်ပွဲစုံ ၂၃၄ ပွဲကစား၊ ၉၅ ဂိုး သွင်းယူပေးထားသည်။
