လီဗာပူးလ်အသင်း၏ ဂျာမန်နည်းပြ ယာဂန်ကလော့ပ်က ယခုယူရို-၂၀၂၀ ပြိုင်ပွဲတွင် ဂျာမနီအသင်းကို အောင်မြင်မှုမရနိုင်ဟု သတ်မှတ်ပါက ရူးသွပ်ရာကျလိမ့်မည်ဟု ပြောကြားခဲ့သည်။
ဂျာမနီအသင်းသည် ရှုံးထွက်(၁၆)သင်းအဆင့်တွင် အင်္ဂလန်အသင်းနှင့် ရင်ဆိုင်ရမည်ဖြစ်၍ အင်္ဂလန်မြေတွင် နည်းပြအဖြစ်ဖြတ်သန်းနေသည့် ယာဂန်ကလော့ပ်ကို ဂျာမန်သတင်းစာ Bild က ယင်းပွဲနှင့်ပတ်သက်၍ မေးမြန်းခဲ့ခြင်းဖြစ်သည်။
Bild က ဂျာမနီအသင်း ကွာတားဖိုင်နယ်ရောက်နိုင်သလားဟု မေးမြန်းခဲ့ရာ ယာဂန်ကလော့ပ်က ”ဒီအချိန်မှာ ဂျာမနီအသင်းကို အောင်မြင်မှုမရနိုင်ဘူးလို့ သတ်မှတ်ရင် ရူးသွပ်ရာကျပါလိမ့်မယ်။ ကျွန်တော်တို့ ပြင်သစ်၊ ပေါ်တူဂီတို့နဲ့ ပွဲတွေမှာ ကောင်းကောင်းကစားနိုင်ခဲ့သလို၊ ဒီဘက်နှစ်တွေမှာ တခြားပြိုင်ဘက်တွေကိုလည်း အခက်တွေ့အောင် လုပ်ပြနိုင်ခဲ့ပါတယ်။ ကျွန်တော်တို့ ဟန်ဂေရီနဲ့ပွဲမှာ ရုန်းကန်ခဲ့ရတာ မှန်ပါတယ်။ ဒါပေမဲ့ အဲဒီလို ထပ်ဖြစ်စရာမရှိပါဘူး။ တစ်ခါတစ်ရံမှာ အသင်းတစ်သင်းက အဲဒီလိုပွဲမျိုးတစ်ပွဲလောက် ကြုံတွေ့ဖို့ လိုအပ်ပါတယ်။ အခု အင်္ဂါနေ့မှာ ကျွန်တော်တို့ စစ်မှန်တဲ့ပုံစံကို ပြသသွားပါလိမ့်မယ်”ဟု ပြောကြားခဲ့သည်။
ယင်းပွဲကို အင်္ဂလန်နိုင်ငံ၊ လန်ဒန်မြို့ရှိ ဝင်ဘလေကွင်းတွင် ယှဉ်ပြိုင်ရမည်ဖြစ်၍ အင်္ဂလန်အသင်း အားသာချက်ရရှိလိမ့်မည်ဟု ထင်ကြေးပေးသူများပြားနေသော်လည်း ဂျာမနီအသင်းက ဝင်ဘလေကွင်းတွင် နိုင်ပွဲပိုမိုရရှိထားကြောင်းလည်း သိရသည်။
အင်္ဂလန်အသင်း၏ ကွင်းလယ်ကစားသမား ဟန်ဒါဆန်ကမူ ယာဂန်ကလော့ပ်၏ အင်္ဂလန်ပရိသတ်များအကြား ပေါ်ပြူလာဖြစ်လာမှုက အင်္ဂလန် -ဂျာမနီအားပြိုင်မှုကို လျော့ကျစေခဲ့သည်ဟု သုံးသပ်ခဲ့သည်။
ထို့ပြင် အင်္ဂလန်နှင့် ဂျာမနီအသင်း ဆုံတွေ့ရမည်ဟု သိရှိပြီးနောက် မိမိထံပြုံးပြသည့် Emoji ပေးပို့ခဲ့သည်ဟုလည်း ဆိုခဲ့သည်။
